Ministru Ministériu Interiór (MI) Francisco da Costa Gutteres husu Autoridade Protesaun Sivil (APC) tenke sériu halo jestaun ba prevensaun dezastre naturais iha Timor-Leste hodi proteje komunidade sira husi risku dezastre.
Nia dehan, APC eziste hodi serbí povu liuhusi prevene risku dezastre ba asidente grave no katastrofes ne’ebé mosu iha Timor-Leste, no tanba ne’e tenke avalia no identifika planu prioridade sira no jestaun servisu hodi implementa fali iha tinan ida-ne’e nia laran.
“Ita haree kazu dezastre balun to’o ema balun lakon vida, ezemplu hanesan ahi-han uma, ai-hanehan, mota lori, ida ne’e APC tenke funsiona ho di’ak, hodi bele halo prevensaun liuhusi sosializasaun ba komunidade sira oinsá hadook an husi risku dezastre,” MI Guterres hatete.
Ministru haktuir katak knaar ne’ebé durante ne’e APC halo importante hodi fó apoiu ba komunidade halo prevensaun, no ajuda komunidade sira ne’ebé sai vitima wainhira mosu dezastre naturais, nune’e mós halo identifikasaun ba área risku sira.
Nia dehan, estadu kontinua institusionaliza servisu APC hodi sai instituisaun ida forte.
“Tenke dedika an atu serbí povu, tanba governu fó fiar ba imi atu tau matan ba komunidade. Tanba ne’e serbí povu ho dignu husi ameasa dezastre sira. Halo jestaun hodi redusaun risku ba dezastre nobuka dalan fó hatete ba komunidade kona-ba impaktu risku dezastre, sosializa ba sira atu hodi antesipa dezastre,” nia dehan.
Entretantu, Prezidente APC Jesuíno dos Reis Matos Carvalho dehan, preokupasaun no sujestaun sira anota ba oin sei esforsu no hadia di’ak liután hodi servi povu ho dignu tuir orden estadu nian.
“Ita-nia progresu servisu durante ne’e la’o, maibé ita rekoñese menus ekipamentu, rekursu humanu no infraestrutura, maibé dever ami -nian kontinua servisu hamutuk hodi atinji progresu,” nia salienta.Nia dehan, hanesan lideransa APC kontinua esforsu hodi halo prevensaun, mitigasaun no resposta ba situasaun emerjénsia no katástrofe oi-oin iha Timor-Leste.
