Durante fulan rua Janeiru to’o Fevereiru 2025, Organizasaun Naun Governamentál (ONG) FOKUPERS (Forum Komunikasaun ba Feto Timor-Leste) rejistu kazu violénsia hasoru feto no labarik feto hamutuk 40 ne’ebé mak akontese iha teritóriu laran.
Diretora Ezekutiva FOKUPERS Domingas Afonso Amaral dehan, tuir informasaun ne’ebé aprezenta husi vítima sira kazu sira-ne’e komete husi família rasik nune’e mós husi ema seluk.
“Iha fulan rua hahú husi Janeiru to’o Fevereiru 2025 ne’e, ita rejistu kazu violénsia kontra feto no labarik-feto sira hamutuk 40,” nia dehan.
Nia dehan, prosesu ba kazu sira-ne’e balun iha ona desizaun final, balun iha prosesu nia laran, no FOKUPERS kontinua apoiu vítima sira hodi hetan justisa tuir lei ne’ebé vigor iha Timor-Leste.
“FOKUPERS esforsu nafatin hodi halo mudansa ba violénsia hasoru feto no labarik feto tanba kontinua buras iha ita-nia rain, no feto nafatin sai vítima ba hahalok violénsia husi mane,” Diretora Ezekutivu FOKUPERS Amaral dehan.
Nia salienta, vítima hirak ne’e violénsia ne’e la’ós de’it ba feto adultu, maibé ba mós labarik minoridade sira.
“Ita husu ba entidade hotu atu hala’o nia funsaun ho loloos hodi hola responsablidade no halo asaun ne’ebé kontribui ba paz iha sosiedade no nasaun hodi halo prevensaun ba hahalok violénsia hasoru feto no labarik-feto sira iha Timor-Leste,” nia informa.
Alende ne’e nia husu mós ba parte Judisiáriu sira atu foti desizaun hodi julga autór krime sira ho pena tuir lei ba aktu krime ho rigorozu.
Entretantu, Sekretária Sekretáriadu Estadu Igualdade (SEI) Elvina Sousa Carvalho hatetedadaun ne’e governu servisu hamutuk ho parseiru nasionál no internasionál sira hodi halo redúsaun ba violénsia hasoru feto no labarik-feto iha Timor-Leste.
“Esforsu ne’ebé ita halo mak liuhusi sensibiliza informasaun ba komunidade sira kona-ba hapara violénsia kontra feto no labarik feto sira. Ita mós servisu hamutuk ho universidade sira hodi bele apoiu prevensaun,” nia informa.
Nia hatete, papél IX Governu Konstitusionál, liuhusi SEI, servisu ho parseiru relevante hodi halo advokasia ba servísu ne’ebé iha, hodi halo prevensaun ba violénsia doméstika no violénsia hasoru feto no labarik-feto iha Timor-Leste.
