Bee Timor-Leste, Empressa Publika (BTL) konstrui ona tanki bee nian hamutuk haat (4) iha Tasi-Tolu, iha kapital Dili, atu nune’e komunidade sira ne’ebé hela iha ne’eba bele uza ba nesesidade loron-loron nian.
“Durante ne’e ita hatene katak komunidade sira ne’ebé mak hela iha iha area Tasi-Tolu ne’e barak mak tenke sosa rasik bee, maibé agora ita tau ona tanki hat iha ne’eba bele ajuda ona sira,” Prezidente Komisaun Ezekutivu BTL, Gustavo da Cruz hateten iha nia servisu fatin Kaikoli, Díli.
Nia hatutan, durante ne’e komunidade sira kestiona makaas kona-ba bee, husu tanbasá BTL labele dada bee ba sira.
“Foin lalais governu hasai ona komunidade balun iha fatin ne’ebá, hela balun mak seidauk sai, tanba ne’e mak ami labele dada bee ba sira. Se ami dada bee ba sira mak loron ida governu hasai sira, entaun bee sira ne’e estaga de’it,” nia esplika.
Nia salienta, orienta ona ekipa BTL sira iha baze atu nafatin kontrola tanki 4 ne’ebé mak BTL.E.P konstrui ona iha ne’eba.
Iha fatin ketak, Xefe Suku Comoro Eligio Jose da Silva Marçal, hateten komunidade sira iha Tasi-Tolu ne’e susar tebes atu asesu ba bee moos.
“Bee atu hodi ba haris fatin de’it mós susar tebes, durante ne’e sira sosa de’it bee hodi bele uza ba sira-nia nesesidade loron-loron,” dehan Xefe Suku Comoro.
Nia hatutan, BTL harii duni tanke haat iha ne’ebá, maibé susar atu komunidade sira iha Tasi-Tolu ne’eba atu asesu hotu.
“Komunidade sira iha Tasi-Tolu barak tebes, susar atu sira hotu-hotu bele uza bee tanki haat ne’e. Bee tanki haat ne’e la sufisiente ba sira, tanba ne’e balun tenke hola rasik bee, hodi konsumu,” nia afirma.
