Deputadu Parlamentu Nacional Jose Verjílio dehan, estudante sira ne’ebé dadaun ne’e hala’o estudu iha Universidade Nacional Timor Lorosa’e (UNTOL), Kampus Hera, iha kapital Dili, presiza dormitóriu hodi fasilita sira hela besik eskola.
Nia dehan, estudante sira ne’ebé eskola iha Hera ne’e maiória hela iha Díli dadersan mak sira foin ba, depois hadau malu karreta iha Bekora, feto mane tabele iha karreta no sira lahanoin risku ba sira-nia vida.
“Ita husu ba Governu liuhusi Ministériu Ensinu Supérior Siénsia no Kultura tenke kria dormitóriu ba estudante sira iha Hera,” Deputadu Verjílio dehan.
Entretantu, Ministru Ensinu Supérior Siénsia no Kultura MESSK, Jose Honório da Costa Pereira Jerónimo dehan Kampus Hera iha dormitóriu ba estudante sira, maibé ba de’it estudante sira ne’ebé ho valór di’ak no boot.
“Dormitóriu ne’ebé ita prepara iha Hera ne’e estudante ne’ebé iha direitu hodi utiliza mak iha valór boot no ba estudante sira seluk la iha,” nia dehan.
Nia dehan, bainhira remata ona estudu tenke hamamuk fatin nune’e estudante sira seluk bele utiliza fali.
“Ha’u husu ba estudante sira ne’ebé ramata ona labele hela iha dormitóriu ne’e tenke husik fatin ne’e atu estudante foun sira bele uza fali,” MESSK Honório dehan.
Enkuantu nia dehan, dadaun ne’e governu seidauk iha planu atu halo dormitóriu ba estudante sira, maibé ba oin Ministériu sei tau iha planu orsamentu no husu mós ba deputadu sira hodi tau iha konsiderasaun iha aprovasaun.
Iha parte seluk estudante Teodora Maria Sarmento dehan, dormitóriu iha eskola Hera ne’e ba de’it sira ne’ebé iha valór boot, dalaruma mós sira eskola hotu ona, maibé sira kontinua hela no la fó fatin ba ema seluk.
“Dormitóriu ne’e ami hela de’it durante ami sei eskola bainhira finaliza ona ami tenke sai hodi fó fali ba sira seluk ne’ebé hetan valór boot mak utiliza. Ha’u tinan ida-ne’e remata ona no sai hodi fó fatin ba sira seluk,” nia salienta.
Nia husu ba parte univeridade mós tenke kontola tanba estudante balun ne’ebé hela iha dormitóriu ne’e finaliza ona estudu, maibé sei kontinua okupa fatin ne’e.
