Zelita Sarmento Sequeira hanesan estudante husi Universidade da Paz (UNPAZ) hatete nu’udar joven no hanesan mós estudante ida presiza aproveita tempu ho di’ak hodi hetan esperiénsia.
“Depois ha’u tama iha Universidade da Paz ha’u sempre fahe tempu iha dader bá kampus depois fila kontinua tuir kursu. Husi tempu ne’ebé ha’u fahe, sente iha tebes benefisiu ba ha’u-nia an, tanba bele aumenta mentalidade no abilidade iha área ne’ebé estuda,” Zelita dehan iha Bairo-Pite, Díli.
Nia hatutan, presiza tuir atividade barak hodi prepara nia an banhira remata husi estudu bele kontribui ba sosiedade.
“Ita labele fó razaun ba ita-nia an banhira tuir atividade ida deit, maibé presiza fó tempu ba atividade seluk hodi aumenta ita-nia koñesimentu ihaárea oioin. Tanba idade hanesan ita ne’ebé joven presiza ho badinas hodi aprende barak.
Ba maluk joven sira tempu sei la hein ita, maibé ita maka duni tuir tempu, tanba hanesan joven buat ne’ebé bele halo, halo tiha lai ba, selae sei arepende iha loron ikus no ba maluk joven sira-ne’ebé ekonomia familia lasufisiente, atu kontinua estudu aproveita tuir kursu sira karik iha oportunidade bele halo mudansa ba moris,” Zelita afirma.
Entretantu Alfredo Tael Fraga hanesan dosente voluntáriu iha Universidade Nasional Timor Lorosa’e (UNTL) hatete, joven sira-ne’ebé eskola presiza mós fahe tempu hodi tuir formasaun no atividade oioin hodi bele aumenta esperiénsia.
“Ba joven akadémika sira-ne’ebé hala’o hela estudu, presiza fahe tempu hodi buka esperiénsia husi formasaun ne’ebé de’it hodi bele aumenta imi-nia ko`nesementu, tanba iha eskola professor sira hanorin 25% no 75% imi tenki buka tan, ho ida-ne’e hanesan dalan ida hodi trenu imi sai estudante independente,” dehan Dosente Fraga.
Nia hatutan, ohin loron formasaun barak tebes ne’ebé mai ho área oioin ho ida-ne’e presiza fahe tempu, tanba tempu ne’ebé fahe sei fó benefisiu ba futuru.
“Ba alin joventude sira aproveta oportunidade ho imi-nia badinas hodi aprende iha formasaun sira-ne’ebé ho área oioin, tanba tempu ne’ebé imi fahe banhira ba eskola no fila tuir formasaun sira, imi sei bele aproveta esperiénsia lubuk no prepara imi-nia an hodi servi iha futuru karik hetan oportinidade di’ak ba servisu,” dehan Taela.Niahusu ba juven sira labele husi kampus ba uma, maibé presiza buka dalan seluk hodi sai joven inovativu no kreativu hodi hatudu katak tempu ba buat ne’ebé pozitivu sei fó rezultadu di’ak iha futuru.
