Governu Japaun apoiu Governu Timor-Leste liuhusi Ministériu Interiór (MI) hodi dezenvolve setór seguransa marítima liuhusi apoiu lanxa multifunsaun (spead boat) haat (4) ba Unidade Polícia Marítima (UPM).
Ministru MI, Francisco da Costa Guterres, hatete governu Japaun dadaun ne’e kopera ho Governu Timor-Leste liu-liu iha área seguransa nian nune’e mós apoiu dezenvolve servisu UPM nian hodi halo kontrolu ba tasi.
“Governu Japaun apoiu ita dezenvolve seguransa marítima liuhusi apoiu lanxa multifunsaun 4 ba UPM hodi moderniza servisu kontrolu iha tasi,” nia hatete.
Nia dehan, agradese ba tulun ne’ebé fó husi Governu Japaun, tanba kontinua apoiu Governu Timor-Leste liuliu iha setór seguransa nian.
“Ha’u hato’o agradesimentu ba Governu Japaun liuhusi Embaxadór iha Timor-Leste ne’ebé ho laran luak apoiu ita iha área segurasa nian liu-liu atu suporta knaar Polísia Marítima, Polísia Komunitária nomós Autoridade Protesaun Sivil sira. Tanba ho apoiu hirak ne’e bele halo servisu operasional ne’ebé bele responde ba krime no protesaun seguru iha área marítima nian nomós dazastre ruma,” Ministru Guterres informa.
Iha fatin hanesan, Embaxadór Japaun, Tetsuya KIMURA hatete, kona-ba apoiu seguransa marítima ne’e ho objetivu hodi hametin kooperasaun seguransa iha futuru.
“Ami bele apoia ona iha seguransa maritima nian no ami apoiu lanxa multifunsaun 4 ba UPM,” nia informa.
Nia haktuir, iha fulan dezembru liuba, ofisiál sira husi guarda kosteira Japaun nian mai iha Timor-Leste hodi halo kolaborasaun servisu ho ofisiál Timoroan sira liuhusi programa JICA (Japan International Cooperation Agency) hodi ko’alia kona-ba apoiu ne’e rasik.
Nia dehan, Japaun iha komitmentu servisu hamutuk atu promove konseitu seguransa hodi asegura dezenvolvimentu ekonómiku iha Timor-Leste liu-liu iha tasi.
Alende ne’e nia dehan, antes ne’e kooperasaun halo ona hodi apoia tan Polícia Komunitaria (POLKOM) liuhusi formasaun nomós redusaun risku dezastre nian ne’ebé governu Japaun servisu hamutuk ho IOM (International Organization for Migration).
