Komandante Tránzitu Seguransa Rodaviáriu Nacional, Superintendente Asistente Luis da Costa dehan, polícia tranzitu laiha kompeténsia hodi kontrolu ba ba sirkulasaun no halo aprensaun motor-elétriku sira iha estrada públiku, tanba seidauk iha lei espesífiku ida hodi regula atividade refere.
Nia dehan, iha lei Kódigu Estrada númeru 6/2003 artigu 27, ne’e limita kona-ba velosidade sirkulasaun husi motor-elétriku sira, maibé kona-ba kompeténsia kontrolu no foti medida laiha.
Nia hatene, maské labarik minoridade barak mak utiliza motor-elétriku no sira halai arbiru iha dalan públiku mós polísia labele halo intervensaun.
“Ita seidauk iha lei espesífiku ida hodi fó kompeténsia ba polísia tranzitu hodi halo kontrolu no prende motor-elétriku sira iha estrada públiku,” Komandante Costa informa iha knaar fatin.
Nia dehan, governu liu-liu Ministériu Transporte no Komunikasaun (MTK), liuhusi Diresaun Nacional Transporte Terrestres (DNTT), tenke halo lei foun kona-ba autorizasaun ba sirkulasaun motor-elétriku iha estrada públiku.
“Ita haree motor-elétriku ne’e ameasa tebes ba ema nia vida bainhira sirkula iha dalan públiku,” nia dehan.
Entretantu, Xefe Departamentu iha Sekretáriadu Apoiu Tékniku Administrasaun iha DNTT Nelson Sequeira Martins dehan, motor-elétriku ne’ebé dadaun ne’e sirkula iha Timor-Leste iha tipu rua (2) bo’ot no ki’ik.
“Ida boot ne’e mak DNTT autoriza halo sirkulasaun iha dalan públiku, maibé ida ki’ik ne’e la autoriza sirkula iha dalan públiku, maibé iha bairu laran de’it, tanba bazeia ba velosidade sirkulasaun lei kódigu estrada la fó dalan nune’e mós la rejistu iha DNTT,” nia hatete.
Nia dehan, polísia tranzitu mós tenke tau atensaun ba asuntu ne’e no presiza realiza enkontru ida entre DNTT ho Polícia Nacional Timor-Leste liu-liu unidade tranzitu hodi haree asuntu ne’e ba kontrolu sirkulasaun motor-elétriku iha estrada públiku sira.
