Tuir dadus ne’ebé Ministériu Ensinu Supérior Siénsia no Kultura (MESSK) iha, kada tinan feto kuaze pursentu hitu-nulu (70%), mak asesu ba ensinu supérior públiku no privadu sira iha Timor-Leste.
Diretora Jerál iha MESSK Maria Filomena Guterres Lay dehan, kada tinan feto sempre okupa mellor klasifikasaun hahú husi ensinu sekundáriu to’o mellor graduadu iha ensino superior.
“Ida-ne’e hatudu pasu importante ba feto asesu ba ensinu superior,” nia dehan.
Nia haktuir katak, dadus hirak ne’e asesu durante tempu estudante sira rejistu ba ano letivu foun iha instituisaun ensinu supérior públiku sira Universidade Nacional Timor Lorosa’e (UNTL) no Instituto Politécnico Betano (IPB) no mós iha instituisaun ensinu supérior privadu sira.
Entretantu estudante UNTL Angelica da Silva dehan, feto mós tenke asesu ba edukasaun to’o lisensiatura no mestradu hanesan ho mane sira.
“Ita haree iha feto barak mak eskola, maibé moe atu promove sira-nia matenek liuhusi atividade sira iha eskola,” nia hatete.
Nia dehan, husu ba maluk feto sira ne’ebé iha ona oportunidade hodi asesu ba edukasaun iha ensinu supérior matenek ne’ebé iha labale subar de’it, maibé tenke promove no labele husik ema ida iha kotuk.
