Governu Japaun Liuhusi Embaxadór Japaun iha Timor-Leste, entrega tan fasilidade Bee Saneamentu no Ijiene (BESI) sanulu (10) iha Munisípiu Lautem no iha Rejiaun Administrativa Espesiál Oe-cusse Ambeno (RAEOA).
“Ami entrega fasilidade bee, saneamentu no ijiene hamutuk sanulu (10) ba sentru saúde komunitáriu sira iha Lautem no RAEOA,” dehan Embaxadór Japaun iha Timor-Leste, Sr. Tetsuya KIMURA iha Hotel Novu Turizmu, Díli.
Nia hateten, Japaun nafatin kontribui hodi fornese kuidadu saúde ba komunidade.
“Governu Japaun sei nafatin kontribui hodi fornese kuidadu saúde ho kualidade ba komunidade lokál sira, tanba ne’e hein katak fasilidade hirak-ne’e sei utiliza ho efetivu ba iha tinan barak oin mai,” nia esplika
Nia mós husu ba Ministériu Saúde atu garante manutensaun di’ak ba fasilidade hirak ne’ebé iha ona ne’e.
“Fó monitorizasaun no apoiu ba atividade husi grupu inan sira, hodi nune’e realizasaun projetu ida-ne’e sei dura ba tinan naruk,” nia afirma.
Iha fatin hanesan Vise Reprezentante UNICEF iha Timor-Leste, Sra. Ainhoa Jaureguibeitia hateten, atu asegura fasil asesu ba bee, saneamentu no ijiene, ne’e nu’udar komponente importante ida husi kuidadu saúde, tanba bele hamenus transmisaun moras ho efetivu.
“Ne’e signifika katak bee seguru, sentina ne’ebé funsiona, no fasilidade ba tratamentu lixu ho seguru, tenke sai nu’udar negosiavel iha kualker fasilidade saúde, tanba ne’e bele fó protesaun dahuluk hasoru moras sira hanesan diarea, kolera, tifoide, malnutrisaun, gripe no pneumonia,” nia dehan.
Nia hatutan, fasilidade atu soe seringa sira no lixu médiku sira seluk ho seguru aleinde ne’e presize mós bee moos atu hamoos kuartu sira, kama sira, sentina, lensol no fatin-fase ropa ba pasiente sira-nia ijiene pesoal.
“Fasilidade bee saneamentu sira ne’e bele ona ajuda pesoal saúde sira, hodi soe lixu, maske nune’e, lakuna boot iha ba prestasaun servisu, iha seitór bee, saneamentu no ijiene kontinua eziste.
Iha biban ne’e Vise-Ministru Fortalesimentu Instituisionál Saúde, Sr. José dos Reis Mango, hato’o agradesesimentu ba govenu Japaun no UNICEF ba apoiu iha melloramentu bee sno aneamentu ba munisípiu Lautém no RAEOA.
“Lori Ministériu Saúde nia naran dala ida tan, ha’u hakarak agradese ba Governu Japaun ba Sr. Embaxadór, no UNICEF nia [Deputy] Country Representative iha Timor-Leste, ba apoiu tomak durante ne’e, em partikular apoiu ba melloramentu bee, saneamentu, ijiene iha fasilidade saúde sira iha munisípiu Lautem no RAEOA,” nia dehan.
