Unidade Polísia Marítima (UPM), Polísia Nasionál Timor-Leste (PNTL), dadaun ne’e iha ona ró lanxa rápida rua (2) hodi fasilita servisu kontrolu tasi.
Komandante Jerál PNTL, Komisáriu Henrique da Costa, dehan durante ne’e UPM halo kontrolu ba tasi iha rai maran de’it, tanba ró laiha hodi tama ba tasi laran.
“Dadaun ne’e ita iha ona ró lansa rua, hodi fasilita servisu kontrolu tasi hodi halo prevensaun ba atividade ilegál sira,” nia hatete.
Nia dehan, ró lansa rua-ne’e sosa ho orsamentu estadu tinan 2024 nian hamutuk $137,000, hodi fasilita servisu kontrolu UPM iha tasi territoriál Timor-Leste nian.
“Ita garante katak, ró lansa rua ne’e bele fasilita servisu Unidade Polísia Maritima atu kontrala sidadaun sira ne’ebé halo atividade kontra bandu liuhusi tasi,” Komisáriu Costa salienta.
Nia informa, ró lanxa intervensaun rápida rua-ne’e ida sei apoiu UPM destakadu iha Beasu no ida apoiu Sesaun Mergulladora para sira bele halo servisu misaun iha tasi hodi kontrola movimentu sidadaun ne’ebé halo atividade kontra bandu liuhusi tasi.
“Ró Lanxa maritima rua-ne’e bele kontrola mós ema estranjeiru sira ne’ebé halo tranzasaun ilegal husi nasaun seluk. Ita espera ida-ne’e ita-nia parte membru UPM sira iha postu bele halo vizilánsia maka’as liután para nune’e prevene mós krime organizadu sira ho droga,” nia informa.
Iha fatin hanesan Komandante UPM Superintendente Polísia Eugenio Pereira hateten, ró lanxa rua-ne’e sei koloka iha sesaun Buska no Salvamentu no postu UPM Beasu nune’e membru UPM sira bele halo misaun iha tasi ho di’ak.
“Liuhusi jestaun ba iha Unidade Polísia Maritima nian, ami sei halo kolokasaun ba rekursu tuir ró lanxa rua ne’ebé mak ami simu, hanesan prioridade ne’ebé ami sei fó liuliu sira iha sesaun Buska no Salvamentu no ba iha postu Beakou nian,” nia hatete.
Nia hatete, fasilidade sira-ne’e atu ajuda unidade hodi hasa’e intensidade servisu marítima nian liu-liu iha atividade vizilánsia hodi bele kontrola iha parte fronteira marítima nian.
“Iha mundu ne’e ita atu kombate krime ne’e difisil, mais ita nafatin hanesan estadu liu-liu haree kona-ba misaun seguransa nian, ita nafatin iha esforsu ho maneira oioin atu prevene ba iha krime sira ne’ebé mak akontese Tasi Timor-Leste nian,” nia dehan.Alende ne’e nia dehan, UPM durante ne’e hasoru difikuldade oioin, maibé unidade ne’e nafatin eziste halo misaun servisu ho maneira no fasilidade sira ne’ebé natoon hodi kontrola nafatin krime ilegal sira ne’ebé tama-sai liuhusi territóriu Tasi Timor-Leste nian.
