Sekretaria Estadu Peskas (SEP) sei harii tan sentru viveirus ikan nia iha Munisípiu tolu (3) hanesan Aileu, Ainaro no Covalima.
Sekretáriu Estadu SEP, Domingos da Conceição dos Santos hateten, sira sei estabelese tan sentru viveirus iha munisípiu tolu, tanba iha munisípiu seluk kuaze iha hotu ona.
“Ita hakarak atu harii tan sentru viveirus hodi haki’ak ikan iha munisípiu Ainaro, Aileu no Covalima. Purtantu munisípiu sira seluk iha hotu ona,” dehan SEF Conceição iha nia servisu fatin, Comoro, Díli.
Nia hatutan, sentru viveirus sira ne’ebé halo iha tinan kotuk ne’e la konsege utiliza, maibé halo de’it reabilitasaun hodi nune’e bele uza fali de’it.
“Konstrusaun sentru viveirus haki’ak ikan iha tinan kotuk la konsege utiliza, maibé ita konsege halo reabilitasaun husi munisípiu Viqueque, Baucau, Ermera, Bobonaro,” nia esplika.
Nia salienta, RAEOA hetan hela orsamentu ho montante bo’ot, tanba ne’e SEP sei haree hodi hadia uluk munisípiu sira ne’ebé mensiona.
“Iha RAEOA ita seidauk iha planu atu harii sentru viveirus, tanba sira hetan hela orsamentu ho montante boot, tanba ne’e ita uluk preoridade ba munisípiu sira ne’ebé mak ita mensiona. Nune’e hodi harii tan sentru mini viveirus ba área ne’ebé pontesial, liuhusi haki’ak na’in sira labele lao dook hodi ba foti ikan oan, tanba bainhira ba foti iha fatin dook ne’e prejudika ne’e bo’ot,” nia afirma.
Iha parte seluk, Diretora Agrikultura Munisípiu Ainaro, Aguida Judit Mendonça hateten, planu Ministériu Agrikultura Pekuaria, Peska no Floresta liuhusi SEP nian ne’e di’ak atu nune’e komunidade ne’ebé atu hola ikan oan la presiza lao dook.
“Ida-ne’e di’ak liutan, atu nune’e komunidade sira ne’ebé hakarak haki’ak ikan la presija la’o dook ba hola ikan oan,” nia dehan.
Nia hatutan, durante ne’e komunidade sira ne’ebé atu haki’ak ikan, tenke ba hola iha munisípiu seluk, lori to’o fatin ikan oan mak mate barak.
“Ita-nia Komunidade sira iha ne’e barak liuba hola ikan oan iha munisípiu seluk mak lori mai haki’ak iha ne’e, hanesan sira ba hola iha Dili dala ruma ba liutan Liquiçá, sira lori to’o mai iha ne’e balun tenke mate, tanba lori lao dook, maibé planu SEP nian ne’e, ha’u fiar katak tinan ida-ne’e bele realiza,” nia afirma.
