Iha Tinan 2025 Ministériu Ensinu Supérior Siénsia no Kultura (MESSK) apoiu subsídiu ba universidade sira kada univeridade hetan $900,000.
Ministru MESSK, José Honório da Costa Pereira Jerónimo dehan, subsídiu refere foku atu minimiza propinas ba estudante sira kada univeridade, formasaun ba dosente sira, nune’e mós kompleta fasilidade ba universidade nian.
“Tinan ne’e ita apoiu subsídiu ba instituisaun Ensinu Supérior sira tantu públiku no privadu kada univeridade hetan $900,000 hodi realiza programa importante tolu,” nia informa.
Nia dehan, programa importante tolu ne’e primeiru bele hatun propinas ba estudante sira, segundu apoiu formasaun língua ba dosente sira, ikus mak sosa ekipamentu ba universidade.
“Universidade sira ne’ebé la kumpri sira-nia relatóriu ne’ebé iha, ita sei halo desizaun balun ba sira,” Ministru MESSK Honório dehan.
Alende ne’e nia dehan, iha tinan kotuk (2024) kada univeridade hetan subsídiu $200,000 balun $300,000, maibé tinan ida-ne’e hotu-hotu hetan $900,000.
Entretantu Reitór Universidade Katólika Timorense (UCT), Padre Joel Pinto dehan, subsídiu ne’e atu halo dezenvolvimentu ba instituisaun la’ós obrigatóriu hodi hatun propinas.
“Ami la hatun propinas ba estudante, tanba liga ho subsídiu ne’ebé governu fó ne’e natoon de’it,” nia hatete.
Alende ne’e nia dehan, kona-ba formasaun ba dosente no sosa ekipamentu ne’e husi parte univeridade sei realiza.
Enkuantu nia dehan, iha tinan kotuk sira hetan subsídiu $241,000 tinan ida-ne’e dehan $900,000, maibé seidauk atribui.
