Centro Direitos Humanos (CDH) iha Faculdade de Ciências Socias, Universidade Nacional Timor Lorosa’e (UNTL) durante ne’e hala’o nia knaar haree liuba atividade tolu hanesan edukasaun, formasaunno piskiza iha asuntu Direitos Humanos nian.
Diretór Centro Direitos Humanos (CDH), Armindo Maia hatete sentru nia atividade foku ba edukasaun no formasaun ligadu ho asuntu Direitos Humanos.
“Centro Direitos Humanos iha UNTL ne’e, hakarak loke mós ba universidade hotu-hotu iha Timor-Leste, tanba nia ho objetivu atu fornese Edukasaun Báziku kona-ba Direitos Humanos ba ema hotu, informasaun ba akadémiku no sosiedade sivil no mai mós ho vizaun-misaun katak oinsá promove formasaun bele habelar no defende direitos humanos,” dehan Diretór Maia iha Kampus Kaikoli, Díli.
Nia hatutan, CDH uza material sira hanesan brosura, livru hodi fahe mós ba estudante universitáriu hotu-hotu hodi aumenta sira-nia koñesimentu liuliu kona-ba Direitos Humanos nian.
“CDH harii iha tinan 2019 bazeia ba inisiativa konjunta husi União Europeia, Global Campos of Human Rights ho apoiu mós husi Prezidente Repúblika José Ramos Horta no servisu hamutuk ho UNTL,” dehan Diretór.
Iha sorin seluk Senhorina M. Dos Santos hanesan Ofisiál Projetu iha CDH hatete, atividade ne’ebé CDH halo ne’e foku ba estudante, alumni no dosente sira.
“Servisu ne’ebé ami halo hahu husi 2019 to 2022 maka, hanorin Diretos Humanos ba grupu tolu primeiru maka forma defensór ba Direitos Humanos liuhusi oferese bolsu estudu mastradu ba timoroan sira.
Grupu segundu maka profesor sira iha UNTL, ami hili hamutuk 15 tuir formasaun kona-ba Direitos Humanos no grupu terseiru ba finalista no alumnii husi UNTL ne’ebé ami hili ema na’in 15 de’it hodi fasilita no halo asisténsia ba professór no defensor Diretos Humanos sira,” informa nia.
Aleinde ne’e nia dehan, sira halo mós peskiza hodi publika iha livru kona-ba asuntu Direitos Humanos.
Ofisiál Projetu CDH ne’e mós dehan, durante hala’o atividade di’ak, tanba liuhusi kooperasaun ho ajénsia internasionál (USAID, UN Comitee for Human Rights) no nasionál (PDHJ, Centro Nacional Chega, Asosiasaun Chega ba Ita (Acbit) no seluk tan hodi servisu hamutuk hodi haree ba asuntu sira iha Direitos Humanos nian iha Timor-Leste.
Nia hatutan, nia parseiru ho NGO lubuk ida no Centru ne’e hahú harii iha 2019 to’o agora sempre halo servisu ne’ebé barak tebes bazeia ba objetivu husi global kampos katak atu hahu hanorin no formasaun kona-ba Direitos Humanos.
