Diretór Centro Direitos humanos (CDH) iha Faculdade de Ciências Sociais, Universidade Nacional Timor Lorosa’e (UNTL) Armindo Maia hatete, CDH durante ne’e fó oportunidade ba estudante universitáriu sira hodi tuir formasaun hodi hasa’e sira-nia koñesimentu kona-ba Direitos Humanos.
“CDH sempre konvida no fó oportunidade ba estudante universitáriu sira hodi partisipa formasaun kona-ba Direitos Humanos sira hetan modulu, materiál sira hanesan brosura no asiste filme sira. Formasaun ne’e hala’o iha semana-semana hodi hasae joven sira-nia koñesimentu ligadu ho Direitos Humanos nian,” dehan Diretor Maia iha Kampus Caicoli, Díli.
Nia hatutan, estudante ne’ebé partisipa iha formasaun barak maka mai husi estudante UNTL rasik.
“Partisipante sira kuaze mil quinentos (1500) maka tuir formasaun ne’e, ho nune’e iha formasaun ne’e mós la’o tuir objetivu CDH nian katak, fornese edukasaun bázika Direitos Humanos, akadémiku no sosiedade sivil hodi promove edukasaun kona-ba direitos humanos, bele sira bele habelar no defende lala’ok sira-ne’e iha sosiedade,” dehan Diretór.
Aleinde ne’e Neldia Remizia Mendonça hanesan mós partisipante husi UNTL, hatete, hanesan partisipante ba formasaun Direitos Humanos sente kontenti, tanba bele aprende siénsia lubuk iha formasaun refere.
“Ha’u hanesan partisipante ne’ebé hetan oportunidade hodi partisipa formasaun kona-ba Direitos Humanos nian, iha ne’ebá ami aprende kona-ba siénsia Direitos Humanos nian oinsá atu aplika no hatutan fila fali ba sosiedade sira kona-ba diretu ema hotu nian no iha ne’ebá ami mós asiste filmajen sira hodi halo diskusaun,” Dehan partisipante Neldia.
Nia hatutan, bainhira partisipa iha formasaun ne’e bele loke nia hanoin oinsá atu hatene lalaok Direitos Humanos nian ho loloos.
“Hetan oportunidade tuir formasaun ne’e hodi aumenta ha’u-nia koñesimentu kona-ba lalaok diretus humanos nian liuliu iha parte edukasaun nian, ho sira-ne’e hanesan mos informasaun ida-ne’ebé presiza atu hatutan fali ba maluk sira no komunidade hodi loke sira-nia hanoin kona-ba diretu ema ida-idak nian iha moris loron-loron nian,” dehan nia.Nia husu ba joven akadémika sira atu tuir formasaun sira-ne’e, tanba oportunidade sira-ne’e hodi aumenta koñesimentu no abilidade hodi prepara aan ba futuru no bele aplika fali, banhira fila ba idaidak nia suku no aldeia rasik liuliu ba komunidade.
