Jerente Klínika Ordem de Metal Timor-Leste, Norman Magalong hateten, durante ne’e sira halo tratamentu gratuita ba Timoroan hotu, maibé ema balun seidauk hatene no hanoin sira halo tratamentu selu.
“Ami durante ne’e halo tratamentu ba pasiente Timoroan sira-ne’e gratuitu de’it la selu, maibé iha ema balun seidauk hatene entaun sira hanoin ami halo tratamentu selu,” dehan Jerente Klínika Ordem de Malta Timor-Leste, iha nia servisu fatin Pantai Kelapa, Díli.
Nia hatutan, ai-moruk sira-ne’e hetan apoiu husi governu no husi sira nia organizasaun.
“Durante ne’e ami hetan mós apoiu ai-moruk husi governu maibé karik ai-moruk sira ne’e la sufisiente entaun ami-nia organizasaun tenke hola hodi aumenta tan,” nia esplika.
Nia salienta, Klínika Ordem de Malta Timor-Leste mós iha klínika movel ne’ebé mak hahu lao iha tinan 2022 iha Díli laran.
“Ami mós iha klínika movel ne’ebé mak estabelese iha Díli laran iha ne’ebé mak hala’o iha loron 17 april tinan 2022 tinan kotuk,” nia afirma.
Nia akresenta tan katak, Klínika Ordem de Malta Timor-Leste iha Pesoál saúde nain ualu mak hanesan dotór nain tolu, enfermeiru nain haat no parteira nain ida, sira mos iha ambulansia rua hodi tula pasiente sira.
Iha fatin hanesan pasiente Augusta Nunes hateten, nia durante ne’e ba halo tratamentu iha Klínika Ordem de Malta Timor-Leste ne’e, tanba atendementu iha di’ak no ema la barak.
“Ha’u durante mai halo tratamentu ba moras ruma mai de’it iha klínika ida-ne’e, tanba ita mai ema ladun barak no atendimentu iha ne’e mós di’ak loos,” dehan pasiente Nunes.
Nia hatutan, ema barak mak seidauk hatene klínika refere, tanba ne’e kada loron ema asesu ladun barak.
“Ema barak seidauk hatene klínika ida-ne’e, tanba ne’e ita mai halo tratamentu iha ne’e ema ladun iha, dala ruma mos ema hanoin klínika ne’e mai halo tratamentu selu, maibé lae ita mai halo tratamentu iha ne’e la selu maibé gratuita de’it,” nia afirma.
