Komisaun Funsaun Públiku (CFP) rejistu ona funsionáriu públiku hamutuk rihun rua (2000) mak tama ba idade reforma iha tinan 2026.
Prezidente Komisaun Funsaun Públiku Agustinho Letêncio de Deus dehan, funsionáriu públiku hirak ne’e hahú submete sira-nia dokumentu iha tinan 2024 ne’e no iha tinan 2025 ne’e Komisaun Funsaun Públiku hahu halo ona prosesu ba reforma ba sira.
“Dadaun ne’e Komisaun Funsaun Públiku (CFP) ita rejistu ona funsionáriu públika hamutuk na’in 2 mil mak sei reforma iha tinan 2026,” nia dehan.
Nia dehan, funsionáriu hirak ne’e mai husi ministériu sira hotu, hodi husu reforma nune’e mós hodi hadia sistema rekursu umanu iha administrasaun públika.
“Agora dadaun ita halo hela prosesu diskusaun kona-ba reintegrasaun ba funsionáriu idade reforma sira nune’e iha Janeiru tinan 2026 reforma de’it,” Prezidente CFP Letêncio informa.
Entretantu Ministru Justisa Sérgio de Jesus Fernandes da Costa Hornai dehan, dadaun ne’e Ministériu hahú halo rekrutamentu ba funsionáriu hodi substitui sira ne’ebé tama ona ba idade reforma.
“Ita hakarak halo rekapitalizasaun ba ita-nia rekursu uma ba iha ajente administrasaun estadu nian,” nia dehan.
Nia dehan, iha Ministériu Justisa liu-liu servisu guardas prigionais sira hahú kedan husi tinan 2002 nian.
“Dadaun ne’e ita komesa haree halo reforma ba ita-nia kuadru pesoal, no seluk mak oinsa atu eleva sira nia koñesimentu konsolidasaun ho didi’ak ho matenek no kapasidade, hodi halo artikulasaun ba iha reforma hodi aumenta ba ita-nia rekursu umanu ho kualidade,” Ministru Justisa Hornai dehan.
Nia dehan, Ministériu Justisa kompremetidu hodi bele hametin rekursu umanu nune’e orienta ba kualifikasaun ida ne’ebé ke aas.
