Komandu Polísia Nasionál Timor-Leste (PNTL) rekoñese prezensa Ofisiál Polísia Suku (OPS) menus iha suku, tanba la iha fatin atu sira bele halo servisu.
Komandante Jerál Polísia Nasionál Timor-Leste (PNTL) Komisáriu Henrique da Costa dehan, durante ne’e koloka ona Ofisiál Polísia Suku (OPS) ba suku sira iha territóriu laran, maibé sira la iha fatin hodi hala’o sira-nia knaar.
“Ho obstáklu sira-ne’e mak ita rekoñese katak prezensa Ofisiál Polísia Suku (OPS) iha suku ne’e menus,” nia hatete.
Nia dehan, aleinde infraestrutura nune’e mós ekipamentu hodi fasilita sira halo servisu hanesan, radiu komunikasaun no Internet hodi komunika ba eskuadra ka komandu munisípiu no Komandu Jerál.
“Meiu trasporte mós mínimu tebes no kondisaun la di’ak hotu ona,” Komandante Jerál PNTL Komisáriu Costa dehan.
Aleinde ne’e nia dehan, iha eskuadra no komandu munisípiu balun mós la iha edifisiu no ba utiliza fali diresaun balun nia espasu hodi funsiona servisu.
“Difikuldade hirak ne’e mak durante ne’e ita hasoru,” nia informa.
Entretantu Ministru Interiór Francisco da Costa Guterres hatete, prosesu konstrusaun infraestrutura ba PNTL dadaun ne’e hahú husi fronteira mak mai Nasionál.
“Ita konstrui ona postu fronteira hamutuk 47 ita kompleta ho fasilidade, bee mós eletrisidade, radiu komunikasaun no fatin deskansa ba sira,” nia hatete.
Nia dehan, infraestrutura ba Ofisiál Polísia Suku (OPS) tau mós iha prioridade konstrusaun iha tinan ne’e.
“Ita remata tiha konstrusaun postu iha fronteira no sei kontinua kedan konstrui fatin no ekipamentu ba OPS hodi hafasil sira-nia servisu, iha suku,” MI Guterres hatete.
Nia dehan, molok tinan ida-ne’e remata konstrusaun infraestrutura ba Polísia Nasionál Timor-Leste balun finaliza hodi bele utiliza ona.
