Ministériu Agrikultura Pekuária Peska no Floresta (MAPPF) liuhusi Diresaun Nasionál Veterinária sei nafatin halo kontrolu ba moras Rabies iha Munisípiu lima mak hanesan, Oe-Cosse, Bobonaro, Covalima, Díli no Atauro.
Diretora Nasionál Veterinária (DNV) Joanita Bendita da Costa Jong hateten, moras raiva ne’e sei iha nafatin, tanba ne’e ekipa husi veterinária kontinua halo kontrola hodi halo vasina ba asu sira ne’ebé seidauk vasina iha munisípiu lima ne’e.
“Ami kontinua halo vasinasaun moras Rabies nian iha munisípiu lima, tanba ita hatene katak, moras raiva ne’e moris hamutuk ona ho ita, tanba ne’e ita-nia programa vasinasaun ne’e tenke kontinua, liuliu ba asu sira ne’ebé foin moris seidauk vasina ita tenke halo vasinasaun,” dehan Diretora Nasionál Veterinária Joanita iha MAPPF, Comoro, Díli.
Nia hatutan, vasinasaun ba moras Rabies iha munisípiu lima ne’e, tanba besik liuba fronteira, tanba ne’e, vasinasaun ne’e tenke kontinua la’o.
“Husi munisípiu lima ne’e ami halo ona vasinasaun ba asu hamutuk rihun limanulu (50.000) no asu 40 mak pozitivu ba moras Rabies,” dehan nia.
Nune’e iha fatin ketak Diretór Agrikultura Rezional Oe-Cosse Amaro Efi hateten, ekipa veterinária kontinua halo hela sira-nia servisu iha Oe-Cosse hanesan babain.
“Ekipa Veterinária iha Oe-Cosse sei halo kontrola ba moras Rabies, tanba ita hatene katak Oe-Cosse mak besik kedas ho Indonesia, tanba ne’e veterinária nafatin halo monitorizasaun iha ne’ebá hodi halo kontrola ba moras Rabies ne’e,” dehan Diretór Agrikultura Oe-Cosse.Nia hatutan asu sira ne’ebé mak seidauk halo vasinasaun ne’e, veterinária sira buka tuir hodi halo vasinasaun.
