Austrália apoiu moderniza Polísia Nasionál Timor-Leste (PNTL) hodi reforsa jestaun kontrolu iha área fronteira.
Ministru Interiór Francisco da Costa Guterres hatete, apoiu ida-ne’e privilijeiu tebes, tanba apoiu tomak ne’ebé Governu Austrália atribui mai Timor-Leste, liu-liu kona-ba vizaun estratéjiku longu-prazu ba modernizasaun institusionál PNTL hodi haforsa jestaun fronteira.
Nia informa, atu hametin seguransa iha rejiaun tuir mudansa global nian presiza kolaborasaun hosi nasaun hotu atu nune’e bele promove polítika kona-ba moderniza PNTL no Servisu Migrasaun ida ne’ebé foun no sustentábilidade.
“Ita presiza tebes apoiu husi ita-nia parseiru sira liu-liu Austrália hodi moderniza nia reforsa jestaun fronteira hodi kombate krime trans-nasionál ne’ebé sai ameasa ba nasaun,” MI Guterres hatete.
Nia dehan, dezenvolvimentu setór seguransa komesa iha ona mudansa, tanba iha parseiru sira ne’ebé apoiu balun iha área formasaun, balun ekipamentu teknolojia hodi kontrolu no seluk tan.
“Ita haree durante ne’e ita-nia pesoál seguransa fronteira sira halo servisu kontrolu fronteira ne’ebé di’ak tebes maské sei iha difikuldade barak,” nia saliente.
Nia dehan, difikuldade sira-ne’e governu sei rezolve epata por etapa tuir forsa governu nian.
Entretantu Ministru Interiór Austrália Anthony Stephen Burke dehan, kompromisu atu hametin parseria ne’ebé durante ne’e la’o ona, tanba Austrália kontinua fó apoiu ba Timor-Leste (TL), liu-liu kooperasaun servisu iha setór seguransa hodi apoiu Servisu Migrasaun no PNTL hodi asegura fronteira.
“Austrália kontinua apoiu hodi moderniza Polísia Nasionál Timor-Leste (PNTL) nune’e bele reforsa jestaun kontrolu iha fronteira,” nia dehan.
