Tinan 2025 ne’e Ministériu Edukasaun (ME) fó prioridade ba fundamenta literasia no numerasia iha eskola, tanba estudante sira to’o ona terseiru ano mós seidauk lee hatene.
Ministra Edukasaun Dulce Soares de Jesus dehan, labarik sira iha ona treseiru ano mós seidauk hatene lee di’ak, susar liután atu rekupera aprendizajen iha futuru, ida-ne’e hatudu katak estudante sira seidauk domina kona-ba kompeténsia báziku nian.
“Tinan 2025 ne’e ita tau prioriadade ba fundamenta literásia no numerásia iha eskola hodi hanorin estudante sira tanba iha ona terseiru ano mós seidauk lee di’ak,” nia hatete.
Nia dehan, bainhira estudante sira iha terseiru ano mak seidauk lee di’ak ne’e impaktu tebes atu rekupera aprendizajen iha futuru.
“Susar ba sira atu komprende konseitu sira-ne’ebé avansadu no abstratu liu iha klase boot sira,” nia informa.
Nia dehan, governu iha komitmentu atu asegura oportunidade formasaun ne’ebé ekuitativu, nomós halo intervensaun sira hotu ne’ebé asegura katak estudante sira aprende, tanba ne’e, presiza hotu-hotu tenke rekoñese problema no servisu hamutuk hodi rezolve.
“Problema barak, maibé durante ne’e la ko’alia ba malu, ita sei tur hamutuk ho profesór sira hotu iha territóriu laran tomak hodi mai fahe informasaun ba malu, fó ideia ba malu kona-ba asuntu ne’e,” nia informa.
Nia dehan, atu rezolve di’ak liu iha 2025 tenke iha hanoin di’ak atu uza estratéjia ne’ebé inklui vizita estudu sira ba eskola sira ne’ebé la’o ho di’ak, nomós aumenta oportunidade formasaun profisionál ba manorin no dirijente eskolár sira, liu-liu iha nivel nasionál no internasionál.
Entretantu Deputadu António Verdial de Sousa dehan, dezenvolvimentu iha setór edukasaun presiza hadia husi probléma hirak ne’e.
“Tenke hadia hahú agora, liu-liu formasaun profisionál ba manorin sira, hodi bele hanorin estudante sira ho di’ak nune’e molok to’o terseiru ano sira lee hatene ona,” nia informa.Alende ne’e husu mós atu kompleta fasilidade eskola nian liu-liu livru, karteira escolar, tanba dadaun ne’e iha eskola balun estudante sira tuur de’it iha rai.
