Indimizasaun ne’ebé governu fó ba vitíma eviksaun uma-kain 288 iha área Fomentu II ne’e bazeia ba kondisaun uma no fasilidade uma laran.
Primeiru-Ministru Xanana Gusmão dehan, uma-kain atus-rua-ualu-nolu-resin-ualu (288) ne’ebé governu liuhusi Sekretáriu Estadu Asuntu Toponomia no Organizasaun Urbana (SEATOU) muda husi área mota laran Fomentu II ne’e indimizasaun governu selu hotu ona maibé montante kada uma diferente.
“Indimizasaun ne’ebé governu selu ba vitíma eviksaun uma-kain 288 iha Fomentu II ne’e diferente, tanba bazeia ba kondisaun uma no fasilidade uma laran,” nia dehan.
Nia dehan, indimizasaun kada uma diferente, tanba iha uma balun didin ho kalen, balun setengah tembok, balun azuleju, plafon kompletu no kompleta ho sasan uma laran, balun sasan uma laran ladun iha.
“Uma-kain hout-hotu hetan ona indimizasaun, tanba ne’e husu atu koopera ho governu nune’e hodi transporte ba idak-idak nia munisípiu,” PM Xanana dehan.
Nia dehan, área mota laran Fomentu II ne’e risku tebes ba sira-nia vida, tanba ne’e governu hala’o servisu tuir dekretu lei númeru 3/2023 iha loron 17 Janeiru alterasaun dahuluk dekretu lei númeru 33/2008 iha loron 27 Agostu kona-ba ijene no ordem públiku nune’e mós iha dekretu lei númeru 51/2016 dia 28 fulan dezembru kona-ba lisensamentu publisitaria no dekretu númeru 2/2017 kona-ba sistema jestaun rezidu sólidu urbana inkuli dekretu lei númeru 3/2017 kona-ba zona estadionamentu durasaun limitada.
Entretantu Deputadu Antonio Calau dehan, fó apoiu tomak ba servisu Sekretáriu Estadu Asuntu Toponomia no Organizasaun Urbana (SEATOU) oinsá organiza sidade Díli maibé presiza tratamentu dignu ba sidadaun sira.
“Ha’u konfirma ho família vítima eviksaun balun dehan, to’o ohin loron balun seidauk hetan indimizasaun husi governu maske foti ona númeru konta bankária, tanba ne’e ita husu governu tenke trata ita-nia povu ho dignu,” nia informa.
Nia dehan, hasai sidadaun sira iha espasu públiku no área risku sira, maibé tenke fó tratamentu no umanidade hodi labele halo povu sira tanis.
Iha parte seluk Vítima Eviksaun Maria Marques Colo dehan, nia númeru konta bankária entrega ona ba governu iha tinan kotuk to’o sai ona sira husi fatin refere, maibé seidauk simu indimizasaun.
“Ami sai ona vítima bainhira loos mak ami bele hetan indimizasaun oitoan ka barak pelumenus governu tenke konsidera no dignifika, atu nune’e ami bele sente katak hela iha rai rasik,” nia salienta.
Nia dehan, hanesan sidadaun prontu koopera ho estadu no governu hodi husik hela fatin refere, tanba hotu-hotu hakarak dezenvolvimentu.
