Deputadu Bankada FRETILIN iha Parlamentu Nasionál José da Cruz hateten, Kapital Díli presiza hadia no hamoos, maibé la konkorda atu hamoos fali povu husi sidade Díli.
Nia dehan, governu hasai sira, maibé tenke haree mós ba parte seluk, sira ba hela iha fatin seluk, sira bele halo negósiu ho di’ak kalae, oinsá ho oan sira-nia estudu, husik hanesan ne’e de’it ka oinsa.
“Ita tenke hare sira nia hela fatin, oinsa ho sira nia rendimentu loro-loron nian, se muda ba fatin foun, oinsa mak sira nia oan sira-nia eskola se sira tenki sai husi sira-nia hela fatin, no situasaun seluk tan,” hateten Deputadu Bankada Fretelin iha Parlamento Nasional, Díli.
Nia hatutan, reorganizasaun sidade Díli tenki tau ema nu’udar sentru no benefisiáriu direta ba dezenvolvimentu no kresimentu sidade ida nian, la’ós sai fali vítima iha nia rain rasik.
“Reorganizasaun sidade Díli tenki baze ba ordenamentu no planu urbanizasaun ida klaru, selae hasai iha fatin ida mosu fali iha fatin seluk, hanesan akontese tinan kotuk, hasai ho obrigatoriu komunidade iha Bidau Santana, maibé fatin ne’eba la halo buat ida no mamuk hela,” nia esplika.
Aleinde ne’e komunidade afetadu ba Eviksaun Bendito Morais hateten, sira prontu koopera ho governu hodi sai husi fatin ne’e, maibé governu tenke hanoin sira-nia kolen.
“Ami kopera ona ho governu atu sai husi fatin ne’e, maibé governu hanoin netik ami-nia kolen durante ami harii uma ne’e, tanba durante ami harii uma ne’e, ami rasik buka osan hodi harii, tanba ne’e husu governu atu hanoin netik ida-ne’e,” dehan komunidade Fomento II Bendito hafoin hetan eviksaun iha Fomentu iha loron, 4 Janeiru 2025.
Iha fatin seluk Sekretáriu Estadu Asuntu Toponímia Organizasaun Urbana (SEATOU) Germano Santa Brites Dias hateten nia halo servisu tuir de’it lei.
“Ha’u halo servisu tuir de’it lei, se lei haruka sai ok sai, ita hotu iha lei nia okos,” dehan Germano.
Nia haktuir, iha tinan kotuk ekipa tun hodi fó hanoin katak komunidade sira ne’ebé hela iha mota laran ne’e atu hamamuk ona fatin, maibé até agora komunidade sira-ne’e kontinua hela.
“Iha tinan kotuk ita fó hatene ona komunidade sira-ne’e atu hamamuk fatin, maibé komunidade sira ne’e ulun to’os kontinua hela, entaun hakarak ka lakohi ita tenke hasai sira obrigatóriu,” nia esplika.
Nia salienta tanka katak, komunidade sira ne’ebé sai ne’e balun ekipa asegura ona sira iha karantina Tasi Tolu, no halo ona rezistrasaun hodi foti sira-nia kartaun eleitoral no konta bankaria.
Nia husu ba komunidade sira atu koopera ho governu atu nune’e bele hadia sidade Díli sai diak liután.
