Akompanhante pasiente timoroan iha Hospital Siloam Semangi, iha Jakarta Selatan, Zinha Freitas hateten pasiente ho nia akompanhante sira iha Indonesia lorloron tenke lao ain ba hospital, hodi hetan tratamentu saúde tanba fulan rua resin governu la fo osan transporte no han nian.
Nia dehan iha fulan Outubru sira la hetan osan han tama to’o fulan Setembru foin adidu entrega osan han nian ba loron 15 hamutuk $300 no katak tama to’o fulan Novembru seidauk halo pagamentu.
“Ami iha ne’e araska loos, lorloron ami han deit sasoro no lao ain kuaze kilometru ida ho balun ba hospital hodi hetan tratamentu,” nia hateten via telefone.
Nai dehan tuir lolos pasiente sira ne’ebe halo tratamentu iha Indonesia, kustu alimentasaun loron ida $10 ba ema ida, entau ema nain rua pasiente no akompanhante hamutuk $20 kada loron.
Nia hateten problema ne’e sira hato’o ona ba adidu no pontu focal ministerio saúde nian, maibe resposta katak osan seidauk haruka ba adidu sira no tanba ne’e pagamentu mos tarde.
Hatan ba kestaun ne’e, Diretora Jeral Prestasaun Servisu Saúde, Ministerio da Saúde, Doutora Odete da Silva Viegas rekunhese pagamentu ba pasiente no akompanhante sira iha liur atraza tanba ne’e akompanhante sira kestiona.
Nia dehan governu la fo opsaun seluk ba pasiente sira atu deve ema nia osan, maibe husu sira atu komunika ho adidu sira hodi buka solusaun tanba sistema iha rai laran ne’e burokrasia demais.
“Osan laiha, adidu mos tenke buka meuis hodi rezolve problema sira ne’e, tanba ne’e ita tau adidu iha ne’eba. Ita la husu pasiente sira atu ba impresta ema nia osan, maske osan atraza tanba prosesu mekanismu finansas maka hanesan ne’e hodi tarde haruka ba,” nia hateten.
Nia dehan osan ne’e tama prosesu ona atu haruka ba konta bankaria adidu sira nian atu bele foti hodi entrega ba pasiente ho akompaniante sira ne’ebe dadaun ne’e halo hela tratamentu iha Indonesia.
