Presidente Konselho da Imprensa (KI), Virgilio da Silva Guterres hateten media iha Timor-Leste ladun fo importansia atu halo kobertura ba asuntu mudansa klimatika, maske frekuentemente sempre hetan impaktu husi mudansa klimatika hanesan El Niño, ne’ebe akontese dadaun.
Nia fo ezemplu fulan kotuk liu ba akontese ahi han rai iha Munisipio Ermera no Lokisa, media la foti ida ne’e hanesan kobertura principal.
“Kobertura durante ne’e barak liu maka politika, hahu husi pajina primeiru to’o ikus, nune’e mos radio no TV sira, ba asuntu mudansa klimatika ladun barak,” nia hateten bainhira partisipa iha abertura formasaun ba jornalista sira ho tema ‘Media ho Mudansa Klimatika’ iha salaun Yayasan Hak, iha Farol, Dili.
Nia dehan media hanesan instituisaun ida ne’ebe importante atu halo advokasia ba asuntu sira ne’ebe urgente no seriu hanesan mudansa klimatika tanba mudansa klimatika afeta setor barak hanesan agrikultura, saúde, no seluk tan.
Entertantu, Presidente Asosiasaun Jornalista Timor-Leste (AJTL), David Hugo hateten kobertura media ba asuntu mudansa klimatika menus tanba fator kunhesimentu no komprensaun ne’ebe sei menus kona ba mudansa klimatika.
“Ami tenta hasa’e kunhesimentu jornalista sira nia, no enkoraja sira atu laos deit halo kobertura ba asuntu politika, finansas, maibe hare mos asuntu mudansa klimatika tanba nia impaktu bo’ot tebes ba ita nia komunidade,” nia hateten.
Nia konsiente formasaun loron tolu (13-16 Novembru 2019) ne’e la sufisiente ba jornalista sira atu komprende buat barak konaba mudansa klimatika no nia impaktu sira, maibe jornalista sira bele iha informasaun baziku atu bele dezenvolve topiku kobertura ne’ebe diak ba asuntu ida ne’e.
Iha parte seluk, Reprejentante UNESCO Jakarta, Lim Ming Kuok hateten sira prontu atu apoiu organizasaun media sira iha area kapasitasaun atu bele aumenta kunhesimentu jornalista sira nian iha asuntu mudansa klimatika.
Nia dehan Timor-Leste hanesan nasaun-ilha importante tebes atu ema hotu iha kunhesimentu no komprende kona ba mudansa klimatika no media nia papel atu fo edukasaun ba publiku, liu husi publikasaun sira.
“Mudansa klimatika sai hanesan dezafiu ida ne’ebe identifika iha Objetivu Dezenvolvimentu Sustentavel. Ita tenke servisu hamutuk suporta malu iha edukasaun atu hasa’e kunhesimentu ema nian, liu-liu jornalista sira atu sira bele fo sai informasaun ne’ebe klaru kona ba mudansa klimatika ba lee nain sira,” nia hateten.
Nia dehan UNESCO servisu hamutuk ho KI tradus ona manual formasaun ba jornalista sira kona ba mudansa klimatiak iha Asia Pasifiku, ne’ebe bele fasilita jornalista sira atu identifika asuntu no halo kobertura.
