Autoridade Nasional Petroleo no Minerais (ANPM) la autoriza ema negosiante sira faan gajolina iha dalan tanba lisensamento ba sira la iha.
Diretor Diresaun Downstream ANPM nian, Nelson Soares de Jesus hateten faan gajolina ne’e perigorozu itoan tanba ne’e ANPM la fo lisensa ba faan iha dalan, tenke faan iha fatin ne’e proprio hanesan posto abastesimento kombustivel.
“Ita la autoriza negosiante sira ne’ebe faan gajolina iha dalan, maibe ita rekonese katak negosiante sira faan duni iha aqua ida dalan dalan, buat sira ne’e neineik ita sei kontolo hotu,” Diretor Downstream hateten.
Nia dehan, hakarak halo bisnis faan gajolina tenke hari posto kombustivel hodi faan tanba ema hasai osan ona atu sosa mina ne’ebe mak ho kuantidade lolos.
“Tenke tau iha posto kombustivel nune’e ANPM hodi kontrola nia folin ho kuantidade mina, tanba ema ne’ebe faan iha dalan balun iha dólar 1, balun dólar 2. Maibe iha posto kombustivel nia presu mundial, presu ne’ebe mak sira bele halo bisnis,” nia dehan.
Entretanto Jerente ba Downstream kompana Esperansa Timor Oan (ETO), Alberto Soares Aniseto hateten ANPM tenke regula ema sira ne’ebe faan gajolina iha dalan maibe tenke mos kria kondisaun diak ba sira.
“Tenke kria kondisaun diak nune’e bele tau ita nia maluk sira ne’ebe mak faan iha dalan ninin husi masa botir, bele transaforma fali ba buat diak ida. Presija regulador sira hare,” Jerente ETO hateten.
Nia konkorda labele tau masa botir sira ne’e iha dalan publiku tanba ida ne’e la diak hatudo ambiente ne’ebe mak diak no ne’e presija hadia.
Entretantu, negosiante faan gajolina Maria Gorete hateten nia kbik la to’o atu hari fatin kombustivel tanba gajolina ne’ebe mak nia faan iha aqua ne’e hodi sustenta nia moris.
“Osan ne’ebe mak hau hetan husi faan gajolina ne’e la sufisiente hodi sustenta hau nia vida oinsa hau bele halo posto kombustivel,” negosiante Maria Gorete hateten.
Nia dehan, gajolina ne’ebe mak sira faan sira sosa fali husi ema, depois sira faan aqua ida 1 dolar osan ne’ebe sira hetan hodi sustenta ona sira ba eskola.
Tanba ne’e nia dehan, governo bando faan mina iha dalan ne’e, governo tenke kria kondisaun diak nune’e sira bele fila liman ho gajolina ne’ebe mak sira iha.
