Vice Ministru da Saúde Asuntu Dezenvolvimentu Estrategiku, Bonifacio Maucoli dos Reis hateten padraun estrategia finansiamentu saúde ne’e importante tebes ba governu no ninia parseirus atu bele halibur rekursu finanseiru ne’ebe sustentavel hodi haforsa sistema nasional saúde nian, liu-liu suporta atividades prestasaun kuidadu saúde ho prinsipio universal.
Nia dehan ministerio saúde iha pilar importante hitu (7) maka hanesan haforsa sistema nasional saúde, hasa’e provizaun kuidadu saúde, investimentu ba rekursu humanu liga ba dezenvolvimentu rekursu humanu, investimentu ba infrastruktura no ekipamentus, haforsa sistema finanseiru, monitorizasaun no avaliasaun, hametin koperasaun ho parseiru dezenvolvimentu sira.
“Atu asegura sustentabilidade ba pilar sira ne’e hotu iha forma ekilibradu, tenke iha finasiamentu ne’ebe adekuadu no sustentavel ba funsionamentu makina iha ministerio saúde laran,” nia hateten bainhira partisipa iha forum finansiamentu saúde iha Salaun Auditorium Universidade da Paz, Dili.
Nia dehan fonte finansiamentu setor saúde iha Timor-Leste, 75% husi orsamentu jeral do estado no 25% husi doadores inklui agensia internasional sira.
Nia hateten kompleksidade finansiamentu saúde la hanesan ho finansiamentu jeral tanba saúde liga ho prestasaun kuidadu saúde, ne’ebe relasiona ho vida umana.
Nia espera ho padraun estrategia ida ne’e bele ajuda governu estabelese sistema finansiamentu saúde ne’ebe sustentavel, liu-liu bele halibur reseitas barak liu tan husi instituisaun publika no organizasaun sira ne’ebe halo prestasaun servisu kuidadu saúde iha Timor-Leste.
Iha parte seluk, Xefe Koperasaun Uniaun Eropeia, Simon Le Grand espera estrategia foun ida ne’e bele asegura finansiamentu ba setor saúde hodi fo atendimentu saúde ba populasaun sira ho diak no kualidade tanba sistema ne’ebe forte no metin presiza finansiamentu ne’ebe adekuadu no sustentavel.
Nia dehan Uniaun Eropeia fo apoiu fundus ba setor saúde hamutuk 15 miliaun Euro ba tinan lima (5), hodi suporta programa redusaun malnturisaun no mortalidade labarik iha rai laran.
“Ami espera katak, Timor-Leste bele uza osan ne’e iha dalan ne’ebe diak atu haforsa no hametin sistema hodi hadia estatutu nutrisaun iha rai laran,” nia hateten.
