Autoridade Nasional Petroleo no Minerais (ANPM), lansa Sistema Eletronico ba aktividade petroleo no minerais, liu-liu prosesu lisensiamento hodi loke bisnis iha iha setor petrolio nian iha Timor-Leste.
Diretor Diresaun Downstream ANPM, Nelson Soares de Jesus hateten, sistema eletroniko ne’e operador kompana sira bele uza ho fasil no bele uza ho efetivo.
“Sira bele prosesu licensiamento husi sistema eletroniku ne’ebe mak lansa ona. Sira la persija ba forma iha Autoridade Nasional Petroleo Minerais, maibe liu husi sistema online deit ami mos sei fo lisensa aprovasaun ba sira atu halo aktividade,” Diretor Nelson hateten.
Nia salienta tan, hahu husi 2019 fulan dezembro ema hotu ne’ebe halo bisnis iha setor petroleo no minerais sei uza sistema online hodi aplika sira nian lisensiamento atu loke bisnis iha sector rua ne’e.
“Sistema ne’e bele ajuda sira nune’e labele lakon tempo mai to’o ANPM. Ami mos sei fo rezultado atu hetan lisensa ka la hetan husi online,” nia dehan.
Nia dehan, dadaun ne’e ANPM tenta involve ona kompania 41 ne’ebe mak halo inportasaun kombustivel komposto husi gajolina, gajoel, mina aviaun, no mos alkatraun.
“Ita halo ona lansamento depois ita halo deziminasaun informasuan ba operador sira ne’ebe halo aktividade iha setor petrolio nian liu-liu iha downstream, no sistema ne’e sei implementa iha fulan dezembro,” nia hateten.
Iha fatin hanesan Jerente ba Downstream husi kompanhia Esperansa Timor Oan (ETO), Alberto Soares Aniseto hateten sistema eletroniku foun ne’e bele fasilita sira lalais, maibe sistema ne’e foun dalaruma to’o dalan klaran bele iha problema liu-liu linha internet nian.
“Ita hare situasaun real ne’ebe iha linha internet bele fo mos impakto ba sistema ida ne’e rasik, tanba dalarua ita atu trata prosesu ne’e lalais maibe internet bele impede fali ami liu husi sistema ne’e,” nian hateten.
Nia senti sistema eletroniku foun ne’e diak ona maibe internet mak sei sai problema ba implementasaun sistema refere.
