Organizasaun Nao Govermental Fundasaun Mahein (FM), hateten katak dezintendimento entre instituisaun Polisia Nasional Timor-Leste (PNTL), nia membro polisia Unidade Batalhaun Ordem Publika (BOP) ho elementus husu Forsas Defeza Timor-Leste nia Polisia Militar (PM) iha tereno bainhira halo atuasaun ba konflito sai prekupasaun ba publiku.
Peskizador FM, Sancho Xavier hateten katak tuir sira nia observasun, dezintendimento entre instituisaun rua ne’e akontese bebeik ona no releva falta disciplina iha ajensias ne’ebe tau matan ba asunto defesa no segurança nasional.
“Instituisaun rua ne’e presija iha medida ne’ebe forte hodi hasoru oknun sira ne’ebe involve iha problema ne’e tanba sira hatudu imajen ne’ebe la diak ba publiku,” Peskizador FM Sancho hateten.
Nia dehan, instituisaun PNTL no F-FDTL ne’e lolos serviso hamutuk hodi halo protesaun ba sidadaun.
“Kazu sira ne’ebe involve oknun PNTL ho F-FDTL ne’e ekipa konjuta ne’ebe instituisaun rua ne’e forma hodi halo investigasaun maibe importante liu tenke foti medida ne’ebe rigorojo hodi hasoru oknun sira ne’e nune’e bele hadia problema sira ne’e no mos prevene,” nia dehan.
Nia dehan, membro iha instituisaun rua ne’e barak liu iha edifisiu deit entaun iha tempo sira ne’e problema ne’e mosu sira tun iha tereno mak konflito ne’e hotu ona sempre mosu dezintendimento entre sira iha komunidade nia let.
“Ita hare dezintendiemnto entre instituisaun rua ne’e sai prekupasaun ba publiku tanba sira mak halo atuasuan ba konflito maibe sira mak problema fali,” Peskizador Sanscho hateten.
Entretantu, Komandante PM, Major Abel da Costa Xavier “NIKI” hateten, deziintendimento entre membro polisia militar ho membro polisia Batalhaun Ordem Publika foin lalais iha Dili laran la inpakto ba forsa rua ne’e atu kuntinua garante seguransa ba povu no nasuan.
Nia dehan, dezintendiemnto ne’e problema ki’ik ne’ebe mak parte investigador komando F-FDTL no PNTL forma ona ekipa hodi investiga membro sira.
“Hau husu ba publiku labele tauk no prekupa. Seguransa ba povu metin hela ba iha nivel nasional no Timor tomak, tanba seguransa rua ne’e serviso hamutuk hodi hare estabilidade iha ita nia rain,” Komandante NIKI hateten.
Nia dehan, kazu dezintendimento entre instituisaun PNTL no F-FDTL ne’e sempre akontese deste uluk to’o agora maibe kazu ne’e normal no bele rezolve.
