Manager Klinika Bairo Pite (KBP), Inacio do Santos hateten problema krize finanseiru ne’ebe klinika infrenta fo impaktu bo’ot ba kualidade atendimentu saúde ba komunidades tanba profesionais saúde sira husik hela servisu.
Nia dehan tinan ida ne’e 2019, sira hetan apoiu finanseiru husi governu liu husi gabinete apoiu sosiedade sivil nian ho montante $83 mil, maibe la sufisiente tanba klinika presiza $40 mil kada fulan ou $500 mil ba funsionamentu durante tinan ida.
“Ema barak sei mai konsulta iha ne’e signifika sira fo fiar ba klinika, maibe hanesan jestor iha ne’e ami hare nia impaktu bo’ot liu ba kualidade atendimentu tanba profesionais saúde sira loron ida mai, loron ida lamai ho razaun laiha osan atu selu transporte,” nia hateten iha sevisu fatin.
Nia dehan sira mos hetan apoiu husi emprezario nasional balun ho montante $30 mil, maibe la to’o nafatin tanba klinika iha dividas kuaze $43 mil ba servisu operasional nian no $120 mil salario funsionario nian ne’ebe seidauk selu.
“Salario fulan hira ba kotuk ami seidauk selu, no agora ami deside sira tenke servisu voluntario to’o tinan oin tanba governu liu husi ministerio da saude promete ona atu tau orsamentu,” nia hatutan.
Nia informa iha opsaun tolu ne’ebe presiza tetu atu garantia sustentabilidade klinika nian maka hanesan apoiu fundus husi governu, muda estatutu submete ba instituisaun governu atu governu maka halo jestaun, ou muda estatutu sai fali organizasaun lukrativu.
Nia haktuir total funsionario ne’ebe sei mantein servisu ho klinika hamutuk 30 resin inklui funsionario publiku destakadu 5 kompostu husi mediku nain rua, farmasista nain ida, tekniku laboratoriu nain ida, no enfermeriu ida.
Hatan ba kestaun ne’e, Ministra Interina Saúde, Dra. Élia A. A. dos Reis Amaral hateten tinan ida ne’e sira laiha osan atu apoiu ba klinika tanba limitasaun orsamentu, maibe suporta rekrusu humanu no ekipamentus iha.
“Iha orsamentu jeral do estado 2020 nian, ami tau osan montante $180 mil hodi apoiu Klinika Bairo Pite no espera bele responde ba sira nia preokupasaun,” nia hateten.
