Asosiasaun HAK rekomenda nafatin ba Governu liu-liu Ministeiru Justisa (MJ) tenki iha politika harii prizaun juvenil atu garante katak Timoroan sira ne’e lalika lakon sira nia futuru.
“Ami nia rekomendasaun nafatin ba ministerio justisa atu aloka orsamentu hodi komesa ona harii konstrusaun ba prizaun juvenil tanba prizoneiru jovens sira kahur malu deit ho adultu sira,” Diretor Asosiasaun HAK, Manuel Monteiro hatete.
Nia haktuir katak labarik sira nia direitu ketak husi ema adultu sira, no sira nia prizaun mos tenki estabelesa ketak, para tau fatin halimar atu labarik hodi halo refresin e nomos kontinua aprende eskola.
“Sira la bele para eskola, tenki kontinua estuda nafatin hanesan nia kolega sira seluk iha liur,” dehan nia.
Nia haktuir katak durante governu uluk nian, bazeia ba rekomendasaun husi HAK atu harii prizaun juvenil ida, ministeriu justisa kria ona BOQ maibe orsamentu mak laiha no katak rai mos indentifikadu ona iha Tibar.
Tuir Membro Parlamentu Nasional, Deputado Sabino Soares “Guntur” hateten Governu tenki integra prizaun juvenil ba programa governu para labarik sira la bele akumula hamutuk ho ema adultu sira.
“Tanba iha prizaun ne’e ema barak mai kastigu hotu iha ne’eba, ne’ebe balu tinan boot no balu tinan sei kiik. Hau hanoin katak Asosiasaun HAK nia ideia ne’e loos,” nia haktuir tan.
Nia salietan tan katak sira ne’ebe ho idade sei kik, governu tenki kria kondisões ba sira, atu banhira sai husi ona husi prizaun bele integra fali ho sosiedade.
“Tanba fatin prizaun, fatin ne’ebe halo prevensaun ba ema ne’ebe lao sala dalan, halo prevensaun para sira la bele halo ona krime ka violensia. Maibe tenki fo formasaun ruma para sira mos bele halakon sira nia hahalok aat ne’ebe durante ne’e sira halo,” nia salienta tan.
“Antes sira sai husi prizaun, wanhira sira ba sosiedade para sira integra fali ho sosiedade para la bele repete tan hahalok anterior ne’e,” nia hatutan.
Nia salienta tan katak tanba ne’e governu presisa hare asunto hirak ne’e, laos sira halo ona krime ka violensia abandona ona, maibe lai, governu tenki tau matan nafatin fo formasaun ruma para sira bele evita buat ne’ebe aat.
