Diretor Jeral Pekuaria e Vetenaria, iha Ministerio Agrikultura e Peskas (MAP), Domingos Gusmão hateten virus African Swine Fever (ASF) oho ona fahi hamutuk 10 mil resin iha rai laran.
Nia dehan atu prevene no eradika moras ASF presiza asaun multisektoral tanba ne’e hamosu ekipa task force ida espesifiku atu halo intervensaun.
“Asaun prevensaun no eradikasaun, ita hare prevalensia afeta la makas ita halo prevensaun deit liu husi izola fatin afetado sira, no kontrola movimentu fahi. Maibe kuandu nia prevalensia afetado makas, pasensia ita tenke halo asaun eradikasaun, signifika ita oho hotu fahi sira ne’ebe ita hakiak iha rai laran. Depois fulan nen ita hare, livre ona ita bele hakiak fali,” nia hateten hafoin partisipa iha ekontru estabelesimentu task force kombate ASF, iha salaun MAP Comoro, Dili.
Nia informa virus ASF afeita ona munisipio Dili, Baucau, Liquisa, Ermera, Bobonaro, no Manufahi.
ASF maka moras ida ne’ebe perigozu tebes ba fahi tanba kauza ba mortalidade a’as iha tempu ne’ebe lalais.
Entretantu, Reprezentante Food and Agriculture Organization (FAO), Paula Lopes da Cruz hateten moras ida ne’e emergensia tanba ne’e presiza asaun emediata hodi salva fahi sira.
Nia dehan numeru mortalidade fahi aumenta makas no kunhesimentu komunidade nian ba moras ida ne’e menus tebes no fo ameasa bo’ot ba fahi sira iha rai laran.
“Ita tenke halo asaun emediata hodi responde ba situasaun ida ne’ebe dadun ne’e ita hasoru, kestaun virus ne’e mai husi ne’ebe,” nia hateten.
Nia dehan governu la halo asaun lalais fahi sira sei mate hotu no halo importasaun foun atu hakiak fali, ne’ebe sei lori risku bo’ot liu tan atu hatama moras seluk.
