Diretur Nasional Quarantina Bioseguransa (DNQB), Venancio Oliveira hateten to’o agora sira laiha kondisaun ne’ebe adekuado, liu-liu ekipamentus atu kontrola produtu animal sira ne’ebe tama mai rai laran.
Nia dehan quarantina nia papel bazeia ba dekretu lei no 21/2003 no dekretu lei no 1/2006 atu reforsa sistema inspesaun iha postu entrada sira hodi prevene moras perigu sira labele tama ba rai laran.
“Ita mos rekunhese katak ho fasilidade ida ne’ebe limitado, ita labele garantia moras laiha, maibe ita halo esfrosu atu prevene moras seluk labele tama mai aumenta tan moras ne’ebe dadaun ne’e iha ona,” nia hateten iha Comoro, Dili.
Nia dehan durante ne’e, sira halo inspesaun hare ho matan deit, no hare mos dokumentu sira husi nasaun origin nian tanba lei bandu importasaun husi nasaun afetado moras.
Nia fo ezemplu virus ASF ne’ebe dadaun ne’e afeta hela fahi sira, lahatene mai husi ne’ebe no liu husi ne’ebe.
Alende fasilidade, nia dehan sira mos presiza formasaun sira kona ba moras zoonotiku sira ne’ebe akontese iha mundu atu bele iha kunhesementu.
Nia informa quarantina iha postu oficial lima inklui iha aeroportu, portu Dili, Batugade, Sakato no Salele, maibe postu sira ne’e ekipamentus laiha.
Iha parte seluk, Diretor Jeral Pekuaria e Vetenaria Ministerio Agrikultura e Peskas, Domingos Gusmão hateten virus ASF ne’e foun ba Timor-Leste, maibe bolu atensaun husi governu hodi fo atensaun diak liu tan ba servisu kontrolu sira iha fronteira.
“Ita hari tiha ekipa task force ne’e, ita sei hanoin hamutuk atu hare ekipamentus no formasaun ba tekniku sira ne’ebe kolokadu ba fatin sira atu halao servisu,” nia hateten.
Nia dehan task force ne’ebe estabelese bele halo servisu kontrolu ida ne’ebe integradu hahu husi importasaun, supermerkadu, no survelansia atu bele eradika moras ne’ebe iha ona no prevene moras seluk ne’ebe afeta hela nasaun vizinho sira.
