Sekretario Estado Terras e Propriedade (SETP), Mário Ximenes hateten governu laiha opsaun ba komunidade sira ne’ebe okupa rai Estado nian iha area Tasi Tolu tanba Estado sei la faan rai Estado nian ba kualker sidadaun.
Nia dehan iha rai Estado balun ne’ebe governu presiza halo endeminizasaun ba okupante sira no sira bele buka rai individu balun nian atu sosa hodi harii uma, maibe Estado sei la faan rai.
“Laiha lei ida atu fo autorizasaun ba Estado hodi faan rai ba kualker sidadaun ida, maibe Estado bele fo kontratu arendamentu rai Estado nian ne’ebe iha ba sidadaun sira atu uza deit iha tempu balun,” nia hateten iha servisu fatin Colmera, Dili.
Nia dehan foin lalais governu hasai uma kuaze 20 resin deit tanba uma sira ne’e hari iha fatin ne’ebe bele halo disturbasaun ba visibilidade publiku, maibe laos komunidade enjeral.
“Atu hasai komunidade sira iha Tasi Tolu enjeral ne’e, sei liu husi prosesu ida. Sira ne’ebe foin lalais ita hasai ne’e tanba sira hari uma iha los fatin ne’ebe bele halo desturbasaun ba visibilidade publiku, liu-liu fatin ne’ebe ita uza selebra loron bo’ot sira, ne’ebe konvidadus sira VIP no VVIP husi rai liur mai partisipa,” nia hateten.
Nia informa governu halo rejistu primeiru uma kain hamutuk 200, registu segundu sa’e ba 2.000 resin, no registu dala tolu sa’e ba 3.000, tanba ne’e governu halo asaun hodi prevene atu labele fo despeza bo’ot ba Estado bainhira hasai sira husi fatin ne’e.
Iha parte seluk, Xefe suku Comoro, Eurico da Costa de Jesus hateten rai Tasi Tolu ne’e propriedade Estado nian, no area ne’e tama iha zona protejidu, maibe governu dever moral atu trata nia ema ho dignu katak tuir prosesu.
Nia dehan populasaun sira ne’e husi foho mai iha Dili okupa rai Estado halo mahon ida atu sira bele buka moris, liu-liu servisu, negosio no balun eskola tanba sira laiha kibi’it atu sosa rai.
“Populasaun ne’e atu hela iha ne’ebe deit, tantu rai Estado ita tenke trata sira ho dignu. Pelumenus fo esplikasaun ne’ebe adekuadu ba sira kona ba prosesu atu sira mos bele komprende no sira sente desizaun sira ne’e justu ba sira tanba kalen, fatuk, ai no batu sira ne’e hotu osan,” nia hateten.
Nia dehan fo endeminizasaun ne’e desizaun Estado nian, maibe importante halo levantamentu dadus intermus ekonomiku, social, no fo esplikasaun ne’ebe klean ba komunidade depois fo notifikasaun, liu-liu prazu ba sira atu hamamuk fatin ne’e tanba ema hotu konsiente fatin rai ne’e Estado nian.
