Xefe Suku Comoro, Eurico da Costa de Jesus hateten uma kain 260 resin maka afetado husi projetu extensaun estrada kapital Dili, diresaun rotunda Presidente Nicolau Lobato to’o Raikotu.
Nia dehan governu liu husi Ministerio Obras Publika halo ona identifikasaun ba uma sira hodi prosesu ba iha ideminizasaun.
“Uma sira husi rotunda to’o eskola são Miguel nian ne’e, agora dadaun prosesu hela atu hetan indeminizasaun tanba iha fulan Dezembru nia laran ne’e, sira tenke husik ona fatin ne’e hodi entrega fatin ne’e ba governu atu halo extensaun ba estrada,” nia hateten iha servisu fatin Comoro, Dili.
Nia dehan tuir informasaun, prosesu tenderizasaun ba projetu extensaun estrada ne’e remata ona no konstrusaun sei hahu tinan oin husi kompania Chineza.
Iha parte seluk, Sekretario Estado Terras e Propriedades, Mário Ximenes hateten rai sira ne’e propriedade Estado nian tanba ne’e bainhira Estado atu uza hodi halo dezenvolvimentu populasaun tenke kontribui.
“Ne’e politika governu enjeral nian, tanba ne’e depende bainhira governu atu uza propriedade sira ne’e no ita oferese dadus hodi halo indeminizasaun,” nia hateten.
Iha oportunidade ne’e nia bolu atensaun ba populasaun sira tomak atu labele halo konstrusaun iha rai ne’ebe laos sira nian, liu-liu dominu publiku hanesan tasi ibun, mota nini, estrada ninin tanba governu sei hola medidas seriu.
Nia haktuir lei fo kompetensia no kibi’it ba Sekretaria Estado Terras Propriedade atu administra no halo jestaun ba rai iha teritorio tomak tanba ne’e sei halo esforsu atu administra rai sira iha teritorio tomak.
