Segundu Komandante Polisia Munisipio Dili, Superintendente Asistente Euclides Belo informa, iha fin de semana foin lais polisia prende tan kareta estado neen tanba kontra sirkular governo no. 1/2012 nian.
Nia hateten, kareta estadu hirak ne’e polisia prende tanba halo operasaun iha loron feriadu (Sabadu-Domingo) ba interese privadu.
“Kareta governo 6 mak ami prende, agora para hela iha komando tanba sira la kumpri sirkular governo nian, sira utiliza fali ba sira nia atividade privado,” Superientendente Belo hateten, iha Dili.
Nia dehan, sira prende kareta hirak ne’e tanba sira ultiliza for a oras serviso nian, uza ba nesesidade privado nian.
Sirkular no. 1/2012, nia dehan fo kompetensia ba polisia atu kontrola diak liu, tanba ne’e mak polisia prende kareta estado ne’ebe dadaun sei para hela iha komando munisipio Dili.
Nia dehan, sira sei fo bileti infrasaun ba kondutor ne’ebe mak utiliza kareta ne’e, ba selu iha banko, depois atu devolve fali tenke liu husi kordenasaun ne’ebe mai halo patrimonio estado foin bele intrega ministerio ne’ebe mak kareta ne’e pertense ba.
“Kareta ne’e husi ministerio ne’ebe, ami labele fo sai tanba ami nia knar la’os atu garante kareta husi ministerio ne’ebe , maibe kualker kareta governo sira hotu ne’ebe kontra regras, ami prende,” nia dehan.
Entretanto Komunidade Jose Freitas hateten, dalabarak funsionarui sira utiliza kareta estado hodi halo fali sira nia atividade privado, tula familia ba paceio iha loron feriado.
Tanba ne’e, Polisia tenke kontrola halo cek poin ba kareta estado sira li-liu iha loron sira hanesan fim de semana, fora husi oras serviso nian.
“Tanba iha fim semana ne’e, ita hare kareta estado barak mak tula sira nia familia ba tasi ibun, ba foho, sira utiliza fali kareta estado hanesan privado,” Freitas dehan.
Maibe nia dehan, sira bele utiliza ba hola sira nia nesesidade ne’ebe mak sira presiza, maibe tenke kumpri sirkular ne’ebe mak governo tau ona.
