Jovens Timor oan nain 619 tuir ezame fiziku saude iha Sentro Formasaun Akademia Polisia (CFAP) molok desloka ba Korea do Sul.
Sekretario Estado Juventude no Trabalho (SJT), Nivio Magalhaens hateten, hakarak ba serviso iha Korea do Sul, tenke tuir mos ezame ba sira nia fiziku.
“Ita presiza halo teste fiziku ba sira, tanba sira sei ba serviso iha Korea iha area peskas nian,” SE Magalhaens hateten, iha Dili.
Nia dehan, atu serviso iha area peskas ne’e la’os serviso ne’ebe mak kma’an, presiza preparado intermus fiziku, pronto atu halo serviso iha area ida ne’e.
“Ida ne’e mak ita hakarak, sira hetan tratamento ho diak , digno atu nune’e sira ba iha ne’eba labele akontese tan katak fiziku la diak, serviso todan, dalaruma empregador halo tratamento ba sira mos la diak,” nia dehan.
Alende ne’e, nia dehan oportunidade ba servisu iha Korea du Sul ne’e loke ba publiku sem deskriminasaun.
“Ita hadia sistema hotu inklui selesaun, hanesan kompromisio e hau koalia tiha ona katak programa ne’e tenke loke ba publiku,” nia dehan.
Nia dehan, programa ezame fiziku ne’e sei hala’o loron tolu, SEJT kopera ho Polisia Nasional Timor-Leste li-liu sentro formasaun Polisia, nune’e prosesu hirak ne’e bele iha transparansia.
Entretanto Komandante CFAP, Superientendente Xefe Polisia Agrimino Ramos hateten programa ne’e mai husi SEJT, sira nia pedido ba Komandante Jeral , depois fo despaixo mai sentro formasaun polisia atu ajuda iha ezame fiziku ida ne’e.
Nia dehan, kriteria teste fiziku ba joven sira ne’e la hanesan ho kandidato polisia sira nian, iha material balun halo redusaun tiha.
“La hanesan tanba ezame ba polisia ne’e todan liu, ba sira ne’e ami reduz halai minuto 10 deit, halai iha kampo to’o dala walu deit,” nia hateten.
Kona ba treino iha area tasi nian (nani tasi), nia dehan komandante sei rekomenda ba komandante jeral, tanba iha area ne’e Unidade Polisia Maritima mak bele apoia sira.
