Hafoin Ospital Nasional Guido Valadares (HNGV) limita simu inan partus, liu-liu sira ne’ebe partus ho kondisaun normal, pelo kontrariu numeru inan partus iha Sentru Saude Veira Cruz aumenta kada loron desde fulan Abri (2016) liu ba.
Diretora Sentru Saude Veira Cruz (SSVC), Dulce Tilman, hateten numeru pasiente OPD no inan partus hahu fulan Abril aas kompara ho fulan hirak antes, tanba ospital la simu pasiente baibain.
“Hahu iha fulan Abril ami nia atendementu partus sa’e, tanba ospital nasional la atende partus normal, sira atende deit inan partus ho komplikasaun,” Diretora Tilman informa, iha nia knar fatin, Kaikoli, Dili.
Nia dehan, iha fulan Abril nia laran sira konsege fo ona atendementu partus ba inan nain 100.
Kona ba pasiente ne’ebe labele halo atendementu iha sentru saude ne’e, nia dehan, sira sei halo referral ba iha ospital nasional.
Entretantu Membru Komisaun F (saude, edukasaun, kultura, veteranus no igualidade jeneru), Deputadu Eladio Faculto, konsidera ne’e pasu positivu ida, maibe tenke tau atensaun ba ekipamentus, medikamentus inklui pesoal saude iha sentru sira.
“Hau hanoin ne’e diak mos atu fo espasu ba moras sira ne’ebe grave, tanba ita kahur mos ladun diak,” nia konkorda.
Nia mos husu ba ospital nasional atu labele taka odamatan bainhira pasiente to’o ona iha ospital buka tratamentu, e sosializasaun importante tebes atu komunidade bele intende hodi la’o tuir.
