Tribunal Munisipal Dili (TMD) hala’o julgamentu ba kazu ofensas ba integridade fizika simples ho forma violensia domestika ne’ebe halo husi arguida LF (fen) hasoru vitima GL (la’en), tanba la’en adolteiro ho feto seluk.
Tuir akuzasaun husi Ministeriu Publiku ne’ebe lee sai husi juis prezidente, katak iha data 12/10/2015 arguida ba foho hodi haree arguida nia aman moras, wainhira arguida fila husi foho, arguida nia alin mane hato’o ba nia katak “durante abin iha foho semana rua, maun nunka fila ba uma”.
Hafoin rona tiha ida ne’e, wainhira vitima fila husi servisu fatin, arguida hahu husu ona ba vitima tanba sa nia la fila ba uma durante semana rua arguida iha foho, maibe vitima hili atu nonok no la repsonde perguntas husi arguida.
Iha altura ne’eba wainhira arguida sei koalia hela, vitima tama ba kuartu foti tualha hodi ba haris, tanba sente rai manas, maibe bainhira vitima sai husi haris fatin, arguida soe hotu vitima nia faru iha branda no iha tempu hanesan arguida kaer hela garfu ida iha nia liman.
Wainhira vitima foin atu koalia, arguida uza garfu tau kedas iha vitima nia kotuk laran hodi rezulta kanek no ran suli kedas.
Iha altura ne’eba vitima sente moras, entaun halai ba liur no vitima nia kolega ne’ebe haree attitude ida ne’e konsidera krime, entaun ba kexar kedas polisia.
Hafoin lee sai akuzasuan ne’e, juis prezidente husu ba arguida hili koalia ou nonok, maibe arguida hili koalia hodi dehan, vitima durante ne’e adolteiru hela, maibe nia nunka dehan sai ba arguida, entaun ida ne’e halo nia tensaun alto.
“Nia selingkuh iha hau nia kotuk, maibe nia nunka atu koalia, ema dehan mai hau, maibe hau hakarak rona husi nia, mas nia nunka hateten mai hau,” arguida deklara iha tribuhal.
Nia dehan, durante semana rua vitima la tama uma ne’e mos vitima la fo razaun no la koalia, ne’e mak arguida tensaun.
Iha fatin hanesan vitima mos hato’o nia deklarasaun, hodi rekonese katak nia adolteiru ho feto seluk no promete la halo tan ona.
“Hau halo duni attitude ne’e, maibe hau para ona, no hau fila fali ona ba hau nia kaben no nia simu hau,” vitima hateten.
Nia mos informa, katak nia halo adolteiru fulan ida deit no nia konsiente katak hahalok ne’ebe nia halo ne’e ladiak, entaun nia dside hodi fila hikas ba nia kaben no arguida perdua nia.
Hafoin rona tiha deklarasaun husi vitima no arguida, juis fo pena suspensaun ba arguida tanba arguida involve iha iha krimi, husu ba nia atu labele repete tan attitude ne’e iha future.
