Tribunal Munisipal Dili (TMD) hala’o julgamentu kona ba kazu krimi integridade simples ho forma violensia domestika ne’ebe involve arguido DJ (laen) ne’ebe tuku lezada LG (fen) to’o ibun ran, tanba lezada husu osan.
Tuir akuzasaun Ministeriu Publiku nebe lee sai husi juis prezidente, katak iha dia 26 Marsu 2015, lezada nia alin husu osan ba lezada atu sosa fos no iha tempu hanesan lezada husu ba arguido osan hodi sosa fos, maibe arguido hatan ba lezada dehan “osan laiha”.
Situasaun ne’e konsege hamosu diskusaun naruk entre lezada no arguido, no ikus mai arguido uza nia forsa hodi tuku lezada no basa lezada nia ibun to’o ran.
Tanba lezada sente hahalok ne’ebe mak arguido halo ne’e kontra lei violensia domestika, entaun lezada hato’o keixa ba polisia.
Hafoin lee sai akuzasaun hirak ne’e juis prezidente husu ba arguido atu hili koalia ou nonok, maibe arguido hili koalia hodi dehan ba tribunal katak iha momentu ne’eba arguido osan laiha duni, maibe lezada hanoin arguido fo osan ba feto seluk.
“Hau mak kaer osan duni, maibe iha tempu ne’eba osan laiha duni, no nia deskonfia fali oin-oin nee mak halo hau nervosu hodi baku,” arguido hateten.
Maibe, nia dehan, agora dadaun lezada no arguido diak malu ona no agora dadaun hela hamutuk iha uma ida.
Iha tempu hanesan juis prezidente mos husu ba lezada atu presta nia deklarasaun iha tribunal, maibe iha altrua ne’eba lezada hili nonok hodi prova katak saida mak arguido deklara loos hotu.
Hafoin rona tiha deklarasaun husi arguido, juis prezidente deside fo pena suspensaun tinan ida ba arguido, no husu ba arguido atu labele repete tan aktu hanesan, tanba se la’e arguido sei tama direitamente ba prizaun.
