Membru Parlamentu (MP), Deputada Albina Marcal, husu ba governu atu monta instrumentu seguransa iha tribunal munisipal hat hodi asegura seguransa iha tribunal hirak ne’e.
Nia hateten, lolos tribunal hotu-hotu tenke monta instrumentu seguransa, atu detekta karik iha ema balun lori sasan kroat ou uza sasan ne’ebe bele ameasa ema nia vida iha julgamentu laran.
“Tribunal sira iha potensia atu mosu buat ne’ebe mak ita la espera, tanba ne’e presiza monta ekipamentus ruma ne’ebe bele detekta sasan kroat,” Deputada Marcal sujere, iha Parlamentu Nasional.
Nia dehan, presiza monta CCTV atu nune’e atividades no movimentu ne’ebe mak akontese iha koridor tribunal nian ne’e bele detekta.
Iha parte seluk Diretor Judisial System Monitoring Programa (JSMP), Luis Oliveira Sampaio, hateten iha tinan rua kotuk liu ba JSMP mos kestiona situasaun ne’e, e agora Tribunal Rekursu hahu monta ona instrument seguransa balun iha tribunal munisipiu rua hodi asegura seguransa iha tribunal.
“Iha tribunal Dili iha ona fasilidade ne’ebe bele detekta ema tama sai tribunal, ne’e mudansa ida,” Diretor Sampaio hateten.
Tuir rezultadu monitorizasaun 2015 nian, nia dehan, JSMP konsege deskobre tribunal munisipal ladun iha mudansa barak, ezepto monta instrumentu seguransa iha tribunal munisipiu Dili no Baucau.
Iha fatin seluk komunidade Manuel Sarmento, hateten tribunal sira tenke monta duni ekipamentus deteksaun sira hanesan ne’e, nune’e iha buat ruma polisia bele detekta lalais.
“CCTV ne’e importante no alat ne’ebe mak antes ita tama uza ba cek ne’e, ne’e tenke iha,” nia sujere.
