Diretora Jeral Prestasaun Saude, dotora Odete da Silva Viegas, hateten komunikasaun sai xave importante atu hadia prestasaun servisu pesoal saude sira nian hodi fo atendimentu ne’ebe adekuadu no kualidade ba komunidades.
Nia rekonese, katak dala barak akontese irregularidade iha atendementu saude publiku, ema ida-idak halo ninian, la organiza, maibe bainhira iha enkontru sira halo diskusaun hodi rezolve.
“Komunikasaun importante, liu –liu tenke iha enkontru regular hodi fo hanoin ba malu rezolve problemas,” dotora Viegas hateten, iha Hotel Novo Turismo, Dili.
Kona ba atitude pesoal saude sira ne’ebe durante ne’e sai preokupasaun publiku, nia dehan, lolos ida ne’e labele akontese tanba pesoal saude mai husi juramentu ida, maibe fila ba ema ida-idak.
Maibe, nia dehan, Ministerio Saude sei la tuur nonok, nafatin bolu atensaun ba jestor pesoal saude sira atu bele iha komunikasaun ne’ebe rutina entre pesoal saude no jestor sira kona ba servisus iha ospitais sira.
Alende ne’e, nia hateten, ministerio mos iha planu atu hasa’e tan pesoal saude sira nia abilidade iha parte etika atendementu ne’ebe diak atu pasiente sira bele sente konfortavel hodi hala’o sira nia tratamentu.
Nia rekonese, problema hirak ne’e mosu kauza mos husi tau ema la tuir background edukasaun, tanba deit limitasaun rekursus humanu.
“Rekursu humanu iha, maibe la apropriadu tanba deit situasaun, ita preenxe deit fatin, mesmu sira la mai husi background ida ne’e,” nia hateten.
Iha parte seluk, Prezidente Komisaun F (saude, edukasaun, kultura, veteranus no igualdade jeneru), Deputadu Virgilio da Costa Hornai, hateten, ejiji ba MS no jestor ospital sira atu investiga hodi hadia sistema no prestasaun, tanba pasiente lubun mak sai ona vitima ba problema hirak ne’e.
“Ministerio saude no jestor ospital sira tenke investiga no buka hadia,” nia sujere.
Nia mos husu ba Ministeriu Saude atu investiga kazu pasiente ne’ebe mate iha sala ICU iha HNGV tanba falta de oksigenio.
