Pontu Focal Moras Dengue Ministerio Saude, dotor Frederico Bosco, hateten hahu fulan Janeiru to’o dia 11 Fevereiru tinan ne’e (2016) registu ona kazu dengue hamutuk 35, maioria husi munisipio Dili.
Nia dehan, kada tinan bainhira udan monu rain, kazu dengue sempre registu as iha area urbana, tanba sistema urbanizasaun iha sidade laran seidauk diak no komunidades laiha konsiensia atu hadomi ambiente.
“Ita nia komunidade sei pasivu tebes, hein deit bainhira governu mobilize foin sira halo limpeza, laiha inisiativu rasik husi komunidades,” dotor Bosco hateten, iha Hotel Novo Turismo, Dili.
Nia informa, munisipio hat ne’ebe registu ona kazu dengue mak munisipio Manatuto, Manufahi, Bobonaro no Dili ho kazu 31.
Nia hatutan, intervensaun ne’ebe minsiterio halo mak fahe aimoruk abate ba komunidades atu oho susuk tolun, no halo fomigasaun hodi oho susuk adultu iha area risku sira.
Alende ne’e, nia dehan, sira mos re- ativa fali ekipa nasional prevensaun dengue hodi halo sosializasaun ba komunidades no mobilize sira atu kontrola vector, liu –liu susuk ne’ebe hada’et moras.
Atu prevene moras dengue, nia dehan, presiza iha managementu integradu ida hodi konrola vector iha komunidade nia leet, ne’e responsabilidade ema hotu nian, la’os ministerio saude mesak.
Iha parte seluk Diretora Saude Munisipio Dili, Agustina da Costa Saldanha, hateten sira halo ona intervensaun lubuk ida iha area riskus, liu –liu fomigasaun atu susuk labele habelar ba area seluk.
Nia dehan, ho situasaun klima ida ohin loron (udan), moras dengue aumenta kada minutes iha fasilidade saude sira.
Kona ba medikamentus, reagent no espasu,nia hateten, sentru saude hat (Becora, Veira Cruz, Formosa no Comoro) iha munisipio Dili disponivel tebes atu akumula pasiente sira.
“Ita garantia medikamentus no reagent disponivel atu fo atendimentu ba kazu sira ne’ebe suspeitu ona ba dengue,” nia hateten.
Nia hatutan, saude munisipio Dili mos servisu hamutuk ho governu local liu –liu lideransa sukus mobilize komunidade halo limpeza iha bairo laran, nune’e labele kria susuk.
