Tribunal Munisipal Dili (TMD) hala’o julgamentu ba kazu ofensas ba integridade fizika simpels ne’ebe involve IP (arguida) baku MF (lezada), tanba hadau arguido nia doben.
Tuir akuzasaun Ministeriu Publiku ne’ebe lee sai husi juis prezidente, katak iha kalan tuku hitu, wainhira lezada MF toba hela iha nia kos, arguido ho nia alin feto mai dere odamatan no iha altura ne’eba lezada loke odamatan, maibe sein husu arguida basa kedas lezada no dada lezada nia fuk hodi monu ba rai.
Iha momentu ne’eba, lezada nia kolegas mai sori tiha sira nain rua (lezada ho arguida), ho lian neneik no iis bo’ot arguida hakilar dehan “nia feto puta buka hadau ema nia doben deit”.
Maibe, iha altura ne’eba lezada nonok deit (mesmu sente la sala), tanba antes ne’e arguida nia doben konfesa ba lezada katak nia doben laiha, tanba ne’e lezada mos hakarak namora ho mane ne’e.
Tanba konsidera hahalok arguida ida ne’e ladiak, entaun lezada nia kolega (kos hamutuk) sira lori lezada ba hato’o keixa iha polisia.
Hafoin lee sai akuzasaun hirak ne’e juis prezidente, hateten kazu ne’e hanesan semi publiku, tanba ne’e bele fo dalan ba juis atu halo omologa (dame), ho nune’e juis president husu ba lezada atu kontinua kazu ne’e ou atu dame malu deit.
No iha altura ne’eba, lezada hateten ba juis prezidente atu halo dame deit sira nain rua, e desde akontesementu ne’e, lezada la namora ona ho arguida nia doben.
“Husik ba ami dame malu deit, ba oin ami bele sai kolega,” lezada deklara iha audensia julgamentu.
Hafoin rona tia deklarasaun husi lezada, juis hadame sira nain rua ho maneira haruka arguida husu deskulpa ba lezada hodi sira nain rua hakuak malu no kaer liman sai hanesan kolega diak iha future.
