Ministru Obras Publik Transporte e Komunikasaun (MOPTK), Gastao de Sousa, hateten governu aloka $10 miloens resin hodi konstrui ponte Comoro III ne’ebe sei hahu konstrusaun iha tinan ida ne’e (2016).
Nia hateten, konstrusaun ponte Comoro III hanesan grande projetu husi governu Japaun no Timor-Leste, tanba ne’e prosesu hotu-hotu sei halo iha Japaun.
“Hotu-hotu halo iha Japaun, ami eskolha tipu ponte los hotu ona no tinan ida ne’e bele halo ona konkursu,” Ministru Sousa hateten, iha Dili.
Nia hatutan, kompensasaun ba komunidades ne’ebe afetadu ba konstruksaun ponte ne’e mos agora dadaun governu prepara hela osan no iha tempu badak sei halo pagamentu.
“Kona ba kompensasaun governu timor mak sei toma konta no ami prepara osan $500 mill ital,” Ministru Sousa hateten.
Iha parte seluk Deputadu Antonio Serpa, hateten ida ne’e inisiativa ne’ebe diak, maibe MOPTK tenke kontrola masimu hodi haree kona ba kualidade obra.
“Ita tenke kontrola no haree, tanba kualidade obra ida depende mos ba governu nia kontrolasaun,” Deputadu Serpa sujere.
Entretantu komunidade Mariano Alves, husu ba governu liu husi MOPTK tenke ho rigorozu haree ba prosesu hotu-hotu ne’ebe relasiona ho projetu ne’e.
“Haree kona ba dezenho, BOQ no material tuir duni prosesu legal ne’ebe ita iha,” nia hateten.
