Pontu fokal moras dengue Ministerio Saude (MS), doutor Frederico Bosco, hateten iha fulan Janeiru (hahu dia 1-21) tinan ne’e (2016) konsege detekta ona pasientes moras dengue hamutuk nain hat, maioria afeta ba labarik.
Nia dehan, kazu dengue komesa ataka ona komunidades, liu –liu labarik ki’ik sira, e ministerio halo ona intervensaun hdi fahe abatizasaun ba komunidade sira atu oho susuk nia tolun no halo fomigasaun.
“Hahu tama tinan foun 2016 to’o ohin loron, ita regista ona kazu dengue 4,” doutor Bosco informa via telephone.
Nia hatutan, intervensaun ne’ebe ministerio halo mak fahe abatizasaun no fomigasaun ba area afetado sira iha kapital Dili.
Alende ne’e, nia hateten, ekipa ministerio mos halo sosializasaun ba komunidades kona ba prevensaun no prepara kondisaun fasilidade saude sira hotu hodi atende moras dengue.
Tuir dadus Ministerio Saude, nia dehan, tinan ida ne’e kazu dengue ladun iha kompara ho tinan kotuk, tanba iha tinan kotuk konsege detekta kazu hamutuk nain 97 resin no balun mate.
Iha parte seluk Xefe Sentru Saude Vera Cruz, Dulce Pinto Tilman, hateten iha inisiu 2016 sira registu ona kazu dengue ida, kazu ne’e mai husi bairo Motael.
“Ami nia area Vera Cruz foin iha kazu ida, mai husi area Motael. Ami halo ona intervensaun hanesan fahe abate ba komunidade no sosializasaun ba komunidade oinsa atu prevene an husi dengue,” nia hateten.
Nia dehan, surtu dengue kada tinan sempre registu, tanba ema barak seidauk iha konsiensia hadomi ambiente, komunidade barak sei soe foer arbibu iha baleta kuak sira, entaun fo oportunidade ba susuk atu moris no lorim moras ba sira.
