Ministru Obras Publiku, Transportes e Komunikasaun (MOPTK), Gastao de Sousa, hateten governu aloka orsamentu ho montante $10 miloens hodi halo rehabilitasaun ba estradas iha area rurais.
Nia hateten, ne’e komitmentu governu nian halo rehabilitasaun estradas iha area rurais, tanba povu agrikultura sira presiza lori sira nia produtu hodi asesu ba merkadu inklui bele asesu ba edukasaun no saude ho diak.
“Ami tau osan $10 miloens atu rehabilita estradas rurais, espera tinan ida ne’e bele rezolve buat balun,” Ministru Sousa hateten,iha Dili.
“Ami iha ona lista ne’ebe apropriadu kona ba estradas rurais ne’ebe mak presiza atu hadia iha tinan ida ne’e.”
Mesmu ho $10 miloens labele kobre estrada rurais hotu, maibe nia dehan, governu sei esforsu kada tinan tenke tau osan ba hadia estradas iha area rurais.
Iha parte seluk Deputadu Arao Noe, konkorda atu nune’e povu iha area remotas bele asesu ba merkadu, edukasaun, saude ho diak.
Tanba tuir nia, profesores sira bele lori karteiras ba eskolas iha area remotas ho ativu, presiza estrada diak, inklui atividade pesoal saude ne’ebe lori aimoruk ba postu saude sira bele la’o ho masimu.
“Kuandu estrada diak merkadu mos iha mudansa, tanba produtu ne’ebe povu produs bele to’o mai iha sidade, karteiras ne’ebe mak labele lori to’o iha eskola sira, komesa bele lori ona tanba estrada diak ona,” Noe hateten.
Pelu kontrariu, komunidade Manuel Perreira, lamentavel tanba mesmu kada tinan governu sempre tau osan ba rehabilitasaun inklui konstrusaun ba estradas, maibe kuaze estrada barak mak ho kondisaun aat, liu-liu estrada iha area remotas.
“Ita nia maluk sira ne’ebe hela iha area remotas sofre tebes ba estradas,” nia preokupa.
