Diretora Ezekutivu orgnaizasaun Non Govermental Forum Komunikasaun Feto Timor –Leste (FOKUPERS), Marilia da Silva Alves, hateten Timor–Leste lakon ona valor original husi kostume barlaque, tanba ema interpreta barlaque hanesan negosio.
Nia hateten, kostume barlaque nia valor lolos mak atu fo valor ba malu entre fetosan no umane, tanba ne’e presiza ema hotu nia hanoin hadia kostume ida ne’e ba nia original.
“Valor original lolos husi kostume barlaque mak atu tane malu, respeita malu, hametin relasaun entre familia rua,” Diretora FOKUPERS Alves hateten, iha nia fatin Farol, Dili.
Maibe agora, nia dehan, ema nia intrepretasaun barlaque ne’e ba negosio, entaun mosu hanoin negative mane sira halo violensia fiziku hasoru fen, tanba konsidera baku fen ne’e normal hanesan baku sira nia kuda no karau.
Nia rekonese, katak kostume barlaque la fo vantagen ba feto e lori problema ba sira, tanba realidade feto la hetan benefisio husi barlaqi, mas sira hetan violensia lor-loron husi sira nia la’en tanba fo folin karun.
Entretantu Membru Parlamentu Nasional, Deputada Bendita Magno, hateten ema hotu iha responsabilidade atu muda ema nia hanoin kona ba kostume barlaque.
“Presiza halo los ema nia intrepretasaun sala ne’e, entaun ema ida-idak tenke iha konsensia tanba ema ida moris inan aman kolen hotu,” nia hateten.
