Prezidente Tribunal Rekursu (TR), Guilhermino da Silva, hateten iha fulan Maiu ne’e sei oferese formasaun ba ofisiais justisa no juis sira kona ba estatistika no lideransa nian.
Nia dehan, ofisiais justisa sira hetan formasaun kona ba asuntu estatistika nian, enkuantu formasaun lideransa sei fo ba juis sira.
“Agora dadaun ami define klaru ona, iha program rua ne’ebe mak ami sei realize tuir-tuir malu, formasaun rua ne’e mak estatistika no lideransa,” Prezidente TR da Silva hateten, iha Dili.
Nia hatutan, ofisiais justisa presiza iha konesementu klean kona ba oinsa halo estatistika ba prosesu kazu sira ne’ebe tama iha tribunal munisipal ha (Oe-Cusse, Baucau, Suai no Dili).
Tanba, nia dehan, iha ofisiais justisa balun seidauk iha konesementu iha area halo estatistika ne’ebe ho kualidade.
Iha parte seluk Deputadu Francisco da Costa, hateten formasaun estatistika ne’e nesesidade duni atu hanorin ba ofisiais justisa sira, tanba atu akumula kazu ne’ebe tama mai iha tribunal.
“Oinsa atu regista kazu sira ne’e, ne’e sira presiza atu hatene,” Deputadu Costa hateten.
Maibe, nia sujere, atu ofisiais justisa iha tribunal munisipiu hat ne’e tenke tuir hotu atu nune’e bele balance.
