Presidente Cruz Vermelha Timor –Leste (CVTL), Jose da Conçeicão, hateten tinan ida ne’e sei harii uma ida ba feto faluk iha suku Mau-Chiga, postu administrative Ainaro Vila, munisipiu Ainaro.
Nia dehan, bainhira vizita suku Mau-Chiga hodi entrega kanalizasaun bee moos ne’ebe CVTL halo ba komunidades, hasoru feto faluk ida ne’ebe moris vulneralve liu (oan barak no uma la diak).
“Serteza ona, tinan ida ne’e ami sei harii uma ida ba feto faluk iha suku Mau-Chiga hanesan projetu pilotu,” Conçeicão hateten, iha nia servisu fatin, Bairo Formosa, Dili.
Nia hatutan, uma ne’e sei halo simples deit kompleta ho sanitasaun, tuir kondisaun moris komunidade iha area rural nian (la hanesan uma ne’ebe governu harii).
Orsamentu ba projetu ne’e, nia dehan, mai husi atividades fund raising ne’ebe sira halo (fo formasaun primeiru sokorru ba polisia no instituisaun seluk), husu apoiu emprejario Timor oan balun no apoia husi governu nian.
“Hau sei buka mos fundus liu husi emprejario Timor oan sira ne’ebe iha osan oituan, ami bele husu mos sira nia apoiu atu halo knar ida ne’e,” nia hateten.
Iha parte seluk, Ministra Solidaridade Sosial (MSS), Isabel Amaral, hateten kada tinan governu aloka osan ba CVTL hamutuk $200 mil hodi hala’o atividades humanitarian iha komunidades nia le’et.
“Osan ne’e benefisio direita ba komunidade sira, tanba voluntario sira la simu osan,” nia dehan.
Nia dehan, servisu humanitaria ne’ebe CVTL halo durante ne’e mak kanalizasaun bee moos, sanitasaun, responde emergensia ba dezastre naturais, promosaun saude no formasaun kona ba primeiru sokorrus.
