Ajensia Internasional Korean Internasional Cooperation of Agency (KOICA) fo apoia orsamentu hamutuk $6 millaun ba Ministeriu Agrikultura e Peskas hodi halo Sentru Formasaun Ikan nian iha sub-distritu Maubara, distritu Liquisa.
Ministru Agrikultura e Peskas (MAP), Mariano Asanami Sabino, hateten sentru formasaun ne’e sei halo iha tinan oin.
“Ba joven sira ne’ebe atu sai peskador, ne’e fatin ba sira atu aprende no sei fornese ba sira,” Ministru Asanami hateten, iha Parlamentu Nasional.
Kona ba treinador ne’ebe sei hanorin joventude sira iha sentru formasaun ne’e, nia hateten bele hili treinador husi rai liur no bele mos treinador peskador rai laran ne’ebe kualidade.
Tuir nia, orsamentu $6 miliaun ne’e sufsiente hodi halo sentru formasaun ida nato’on no espera katak bele motiva joventude sira hodi iha interese ba area peskas nian.
Enkuantu Prezidente Komisaun F Parlamentar (saude, edukasaun, kultura, veteranus no igualdade jeneru), Deputadu Virgilio da Costa Hornai, apresia ho ajudus ne’ebe Korea fo liu husi sira nia ajensia internasional iha Timor-Leste ne’e.
“Presiza habarak liu tan sentru formasaun iha nivel distritu, kapasita joventude sira iha area peskas nian,” nia sujere.
Nia mos sujere ba MAP, atu halo registrasaun ba joven sira iha sub-distritu Maubara, nune’e wainhira projetu konstruksaun ne’e remata, sira ne’ebe registradu ne’e bele uja kedas.
Enkuantu Mario Fernandes, nudar jovens ida sente urgulho ho suporta ne’ebe KOICA fo hodi halo centru formasaun kona ba peskas nian ne’ebe sei involve joventude.
“Nune’e joven sira ne’ebe hakarak sai peskador bele kualidade liu,” nia dehan.
